Karma

මොනාලිසාට සමවන අමන්දාගේ සිනහව

කර්ම

ප්‍රසන්න ජයකොඩිගේ කර්ම ගැන සුදත් දේවප්‍රියගේ අදහස්

සිනමා කෘතියක් පිළිබඳ තවත් සිනමාකරුවකු අදහස් පළ කරන්නේ බොහෝ කලාතුරකින්. මේ එබඳු දුර්ලභ අවස්ථාවක්. ‘අඹ යහළුවෝ’ ටෙලි නාට්‍යය නිර්මාණය කොට කීර්තියට පත් සුදත් දේවප්‍රිය තරණය, උඩු ගං යාමය චිත්‍රපට නිර්මාණය කොට සිනමාවේ නමක් තැබුවේය. උඩුගං යාමය, සරසවිය, ජනාධිපති සම්මාන රැසක් දිනා ගත්තේය. මේ දිනවල තිරගත වන ප්‍රසන්න ජයකොඩිගේ කර්ම නරඹා උදම් වූ සුදත් ඒ පිළිබඳ ලියා එවූ ලිපියකි මේ.

සුදත් දේවප්‍රිය

සිනමාව යනු යථාර්ථයම නොවේ.
එය හඹා යන කාලය අල්ලා හසුකර ගැනීමට දරන්නා වූ අති වෙහෙස කර ව්‍යායාමයකි. එසේම සිනමාව යනු අපට අභිමත ලෙස එකට අමුණා, බලෙන් ඔබවා, සකසනු ලබන රූප පද්ධතියක් ද නොවේ.
එය පොදු කාල රටාවක් විසින් නිසඟයෙන්ම ඉල්ලා සිටින රූප මාලාවකි. මෙකී ගුණ සමුදාය කලා ක්ෂේත්‍රය තුළ වැඩි වශයෙන් පවතින්නේ ද සිනමාවේ පමණකි. එහෙත් මෙම අනඟි ගුණය හරි හැටි වටහා නොගත් නිසා හුදු කතන්දර කලාවක් බවට පත් වූ සිනමාව, සිනමාවේ මූලික ගුණය වන කාලය හා අවකාශය නියම ලෙස ග්‍රහණය කර ගැනීමේ හැකියාවෙන් ද අද වියුක්තව සිටී.
ප්‍රසන්න ජයකොඩි සිනමාවේදියාගේ කර්ම චිත්‍රපටය අපට වැදගත් වන්නේ මෙම පසුබිම තුළ අප සිනමාව සතු විශේෂත්වයන් ගැන විමසිලිමත් වන විටය. ඒ අනුව බලන විට කර්ම යනු සැබැවින්ම හෙළ සිනමාවට දායාද වූ අනඟි තිළිණයකි. කර්ම හුදු කතන්දර කලාව මත යැපෙන අපේ සිනමා සම්ප්‍රදායයෙන් ඔබ්බට ගොස් සිනමාව සතු සත්‍යතාවයන් මනාව හසුකර ගැනීමකි.
කර්ම සරල රේඛීයව පෙනෙන කතන්දරයක් අපට නොකියයි. ත්‍රිකෝණගත චරිත ලෙසින් පියල් හා අමන්දාත්, නදීත් අපට හමුවන අතර මෙම චරිත එකිනෙකට වෙනස් වූ බවක් දක්වයි. එකකු අනිකාගේ ජීවිතයට ඉව අල්ලන්නේ තම ජීවිතයේ දුක්ඛ දෝමනස්සයන්ගෙන් හෙම්බත්ව හිස් වූ ඉම පුරවා ගන්නටය. පියල් එවැන්නෙකි.
අමන්දා නම් වූ යුවතියගේ හෘද ස්පන්දනය මිනිස් ශාරීරික අවශ්‍යතාවයක් වන්නා වූ රතීයට පමණක් සීමා වූවක් නොවේ. ඈ ඇගෙන් පලා යන ජීවිතය යළි තුරුලු කරගන්නට කිසිවකු සොයයි. අනිකාගේ ජීවිතයේ තමාට ද සැඟවිය හැකි හිඩසක් දුටු විට ඇගේ උකුළ නිරාවරණය වේ.
නදී වත්මන් වෙළෙඳ කුලය නියෝජනයෙන් පැන නැගුණු අතුරු ඵලයක් මෙනි. සෘජු දේශපාලන මිනුම් දඬුවලින් තොරව නිර්මාණ ගැන කතා නොකරන යුගයක කර්ම චිත්‍රපටය අපට සුවිශේෂී වේදිකාවක් තනා දෙයි. මෙහි චරිත තුළින් ගලා හැලෙන අධ්‍යාත්මික දේශපාලන රටාවේ සුවය අපි මෙහිදී විඳින්නෙමු.
මෙකී තුන් කොන් චරිත අතුරින් මා දුටු කර්ම හි කතා ප්‍රවෘත්තියේ සංසිද්ධීන් මෙසේ ලඝු කොට දක්වමි. සිය මවගේ වියෝව ගැන ස්වයං වරදකාරී හැඟීමක පසුවන අප තරුණයා, පියල්, සිය ජීවිතයේ රික්තකය පුරවාලනු වස් යාබද නිවසේ ජීවත් වන අමන්දාගේ ජීවිතයට එබී බලයි.
අමන්දා පියයුරු පිළිකාවකින් පෙළෙන බව දැනගත් ඇගේ පෙම්වතා නදී දමා පලා යයි. තමා සමීපව යහන් ගත වූ අමන්දා පිළිකාවකින් පෙළෙන මරණාසන්න වූ රෝගියකු බව දැනගන්නා පියල් එය තමා තම මව සමඟ යහන්ගතවීමක් හා සමාන යැයි සිතා වැලපේ. එකී වරදකාරී හැඟීමෙන් ගැළවෙන්නට මෙන් ඔහු අමන්දාව ඇගේ මරණය තෙක් රැක බලා ගනියි.
එනිනෙකට සරලව ගොතන ලද රූප සමෝධනයක් මෙහි දක්නට නොලැබෙන අතර කර්මවල මා දකින සුවිශේෂී ලක්ෂණය වන්නේ එහි චරිත චෛත්‍යසිකයන් හා හැඟුම්බරව අපට බැඳෙන්නට නොදී සමස්ත කෘතියම දෙස ප්‍රේක්ෂකයකු ලෙස ඉහළින් සිට සිදු වන්නේ කුමක්දැයි ඉව අල්ලන්ට සිනමාකරුවා විසින් අපට ලබා දී ඇති අවකාශයයි.
මෙම අවකාශය තුළ අපට හැගුම්බර වීමට ඉඩ නොදෙන ප්‍රසන්න ජයකොඩි අඳුරත්, රතීයත් අතර ඇති විශ්වීයව මානව සබඳකම පරදවාලමින් දුර සිට පියල්ට හා අමන්දාට පෙම් කරන්නට අපව පොලඹවා ගනී.
එහෙත් ඔවුන් හා එකතුව එකී දුක බෙදා හදාගන්නට තවමත් අපට අවසර නොමැත. සිනමාපටය පුරාම අපි කුහුලින් බලා සිටින්නෙමු. මෙහි එන චරිත කවුරුන්ද? ඔවුන් නියෝජනය නව සමාජ සංස්කෘතික හා දේශපාලන පසුබිම කවරේද? යන්න අප විසින්ම සොයා ගැනීමට ඉඩ තබා ප්‍රසන්න බලා සිටියි. අපි අපගේ බුද්ධිය සමඟ සටන් කරමින් මෙකී චරිතයන්හි අක්මුල් සොයන්නෙමු. එය සැබැවින්ම විශ්මජනක චාරිකාවකි.
ප්‍රේක්ෂක ඇසට ඇඟිල්ලෙන් ඇන මේ අසවල් චරිත යැයි අපට නොකියා නිර්මාණකරුවා සිනමාව සතු ශිල්පීය ගුණයක් අතැඹුලක් සේ භාවිත කරමින් මෙම චරිකාව පුරා අපව ගෙනි යයි. එහි ගමනාන්තය සැබවින්ම කාව්‍යාත්මකය. අති සුන්දරය. වරක් ලෝ ප්‍රකට රුසියානු සිනමාධර ඔන්ද්‍රේ තර්කොවුස්කි ‘සිනමාව ඇත්තේ කවිය හා සංගීතය අතර යැයි’ පැවසූ බවක් මෙහිදී මගේ මතකයට නැඟේ.
එක වහළක් යට බිත්තියෙන් එහා මෙහා වෙසෙන චරිත තුනක් සිය අධ්‍යාත්මයෙන් අඳුරු අහුමුළුවල ඔඩු දුවා ඇති කුණු කන්දල් වමාරමින් ස්වයං භාවවිරේචනකයක යෙදෙති. එහි විශේෂත්වය වන්නේ ඒවා හිතාමතා නොකරන අතර එකිනෙකා අතර ඇතිවන අධ්‍යාත්මික ඝට්ටනයක් නිසාම එකී සියල්ල නිසඟව මතු වී ගෙන ඒමයි.
එසේම කර්ම සැබවින්ම සිනමාලංකාරයෙන් පොහොසත් වූ අගනා සිතුවමක් ලෙස අපට ඒත්තු ගන්වන සංකේත රූපවලින් ද පිරිපුන් වූ කෘතියකි. චිත්‍රපටය ඇරැඹෙන්නේ ජල තටාකයක වකුªටු වී ඉන්නා පියල්ගේ රූපයකිනි. විවේක බුද්ධියෙන් යුතුව බලන විට එය මවකගේ කුස තුළ ඉන්නා කලල රූපයක් සේ අපට දැනේ. මෙහි මා දකින කතා නායකයා වන්නේ පියල්ය.
ඔහු සිනමාපටය පුරාම සිය මවගේ වියෝව තමාගේ වරදින් වී යැයි සිතා වියෝවන්නෙකි. හුදු කාමස්වාදය සඳහා අමන්දා වෙත එබී බලන පියල් පසුව ඈ තුළින් දකින්නේ තම මවගේ අහිමි වූ දාරක ප්‍රේමයේ ආස්වාදයකි. අමන්දා හා යහන්ගත වූ දින ඔහු කුඩා දරුවකු සේ හඬා වැලපෙන්නේ ද එබැවිනි.

ප්‍රසන්න ජයකොඩි

රූප රචනය අතින්ද කර්ම සුවිශේෂී චිත්‍රපටයක් ලෙස හුවා දැක්වීමට මම කැමැත්තෙමි. කිසියම් නිර්මාණයක් එළිබට වූ විට එහි පවතින දෑ පිළිබඳ කතා කිරීමට බොහෝ අය මැලි වෙති. ඊට හේතු වන්නේ අප සතුව තිබෙන්නා වූ කුහකත්වයයි. එසේම මුවින් නොබැන මිතුදම් රැක ගත යුතු බැවිනි.
මෙකී කාරණා පසක තබා මට නිදහස්ව ලියන්නට තරම් කර්ම නිර්මාණකරුවා පොහොසත්ව සිටී. රූප රචනයත්, ආලෝකයත්, රාමුව තුළ නළු නිළියන් පෙළ ගැස්වීමත්, කැමරා ධාවනයත්, නිශ්චිත සෘතියක තබා කරන සුසංයෝගය අපගේ බොහෝ චිත්‍රපටවල නොදකින තරම්ය. නළු නිළියන් මෙහෙයවීමේදී ද ප්‍රසන්න සියලු අභියෝගයන් ජය ගන්නේ ජීවිතය පිළිබඳ අපරිමිත අත්දැකීම්වලින් පරිපූර්ණ වූ නිර්මාණවේදියකු සේය.
රූප නිර්මාණයේදී ද අඳුර හා ආලෝකය හැසිරවීමේදී ද නිර්මාණකරුවාට අනඟි සහායක් ලබාදෙන කැමරා අධ්‍යක්ෂවරයා වන පාලිත පෙරේරා ද මගේ මතකයට නැෙඟන්නේ ඔහු තම සිනමාවේදියාට තම සම්මාදම නොඅඩුව සපයා ඇති නිසාමය. අධ්‍යක්ෂවරයකුගේ මනසේ මෝදු වන රූප ඡායා නිසඟ රූප බවට පත්කළ හැක්කේ ශූර කවීත්වයක් ඇති කැමරා ශිල්පියකුට පමණි. කර්මයෙහි කැමරාකරුවා ඒ අතින් පොහොසත් වීම අපගේ අමන්දානන්දයට හේතු වේ.
කර්ම චිත්‍රපටයේ සියලු සංසිද්ධීන් එකට හකුළුවා ගන්නේ චිත්‍රපටයේ අවසාන ජවනිකාවෙනි. එහි ඇත්තේ එකම එක් රූපයක් පමණි. එය සැබවින්ම විශ්මයජනකය. අමන්දා පියයුරක් අහිමි යුවතියක බව අප දකින්නේද එහිදීය. පියල් තම මවගෙන් නොලද ප්‍රේමය ද අමන්දාගෙන් ලබන බවක් එම රූපය තුළ ඔවුන් ස්ථානගත කර ඇති ආකාරයෙන් අපට පසක් වෙයි.
කර්ම චිත්‍රපටයේ මුඛ්‍යාර්ථය ඇත්තේද එතැනය. මෙතෙක් චිත්‍රපටය නැරැඹීමේදී ප්‍රසන්න ජයකොඩි විසින් අපගේ පපු කුහර මත තබා ඇති මහා ගිරිකුල හිම කිරමක් සේ දියව පහව යන්නේ මේ රූප දැකීමෙනි. ඉන් නොනවතින අපි අපගේ බුද්ධියට ආමන්ත්‍රණය කරන්නෙමු. අපගේ ජීවිත මෙහි තබා ඇත්තේ කොතැනද යැයි සොයන්නෙමු.
අපි හෘද සාක්ෂිය අපට කතා කරන්නට පටන් ගනී. අප සිත් අඳුර හා බැඳුණු හුදු රතිය පිළිබඳ පවතින ආකල්පවලින් ලිහී ගොස් කිසියම් අධ්‍යාත්මික සුවයකින් පියල්ට හා අමන්දාට ළං වන්නෙමු. මෙලොව සෑම මිනිසකුම තම පෙම්වතියකගෙන් සොයා බලන්නේ කුමක්ද? ඇය සිය පති භාර්යාව වූ පසු ඇගෙන් පතන්නේ කිනම් රසයක්ද? එය හුදු කාමස්වාදයක් ද නොවේ. ඉන් එහාට අප කැඳවාගෙන යන මහා කරුණා රසයෙන් පිරි මාතෘ ස්නේහයකි.
අවසන් රූප රාමුවේ අමන්දාගේ මුහුණ දෙස බලන විට මට ඇගේ මඳ සිනහව අමතක කළ නොහැක. චිත්‍ර කලාවට ඩාවින්චි මැවූ මොනාලිසාගේ සිනහව කෙසේ ද, ලාංකේය සිනමාවට අමන්දාගේ සිනහවත් එසේමය. ඉන් ධ්වනිත වන අරුත කිමැයි මට නම් කිව නොහැක. එය සිනමාවේ මෙතෙක් මා දුටු කාරුණිකම සිනහව යැයි මා සඳහන් කරන්නේ නිහතමානීවමය.
source- http://www.sarasaviya.lk

Cooti Malli Podi Malli -ටීවී වල ඉන්න අය බස්වල යන්නෙ නෑනේ

පොඩි මල්ලියි, චූටි මල්ලියි එක්ක

හිනා යන කතා පෙළක් සුනෙත් චිත්‍රානන්ද ගාමින්ද ප්‍රියවිරාජ් ඔබ මේ නම් දෙක අසා තිබෙනවාද? පොඩ්ඩක් කල්පනා කරලා බලන්න . . .
වැඩි මතකයක් නැහැ නේද?
එහෙනම් මං මෙහෙම කිව්වොත් . . .
චූටි මල්ලි
පොඩි මල්ලි . . .
ඒ දෙන්නව නම් ඔබ හොඳටම දන්නවා.
සුනෙත්ගෙයි ගාමින්දගෙයි ඇත්ත නම් දැන් නම් හැමෝටම අමතකයි. චූටි මල්ලි, පොඩි මල්ලි කිව්වොත් තමා හැමෝටම මතක. සුනෙත් තමයි චූටි මල්ලි, පොඩි මල්ලි ගාමින්ද. මේ දෙන්නා ඒ නම් දෙක ආරූඪ කර ගනිමින් හාස්‍ය භාවිතයෙන් අපේ මාධ්‍ය තුළ පෙන්නපු හැකියාව අනන්තයි, අප්‍රමාණයි. සතියේ දිනවල සවස 4 – 6 දක්වා දෙරණ ගුවන් විදුලියට සවන් දුන්නොත් චූටි මල්ලිගෙයි, පොඩි මල්ලිගෙයි කතා අහලා හොඳට හිනා වෙන්න පුළුවන්.
චූටි මල්ලිටයි පොඩි මල්ලිටයි අප සරසවියට ගොඩ වෙලා යන්න ආරාධනා කළා. ඒ ඔවුනට සිදු වූ රසවත් අකරතැබ්බයන් කිහිපයක් අසා දැනගන්න. ඒවා කියන්න කලින් ඔවුන් දෙපොළ අප සමඟ මෙන්න මෙහෙම පුංචි සංවාදයක නියැලුණා.
ඔන්න අපි කියපු වෙලාවටම ආවා . . .
ගාමින්ද රැල් බුරුල් ඇරලා කතාව පටන් ගත්තා.
මං මෙතැනින් වාඩි වෙන්නම්.
සුනෙත් අපේ ඡායාරූපාගාරයේ ඇති පුටුවෙහි ඉහල ඇන්දේ ඉඳගත්තා.
මේක හරියට ෆොටෝ ගන්න ස්ටුඩියෝ එකක් වගෙයි නේද?
ගාමින්ද වටපිට බලලා කිව්වා.
මේක තමයි හලෝ සරසවිය පත්තරරේ ස්ටුඩියෝ එක. ඔයා ඒකවත් දන්නේ නෑ.
සුනෙත්, ගාමින්ද කියපු දේට පිළිතුරු බැන්දේ හිනාව මැඬ පවත්වා ගනිමින්.
කොහොමද ඔයාලා හැමදාම වැඩසටහන් කරන්න විහිළු හොයා ගන්නේ? හැමදාමත් එකම විහිළුව කරන්නත් බැහැනේ?
දෙන්නා තවත් දේවල් කියන්න කලින් මං ගාමින්ද දෙස බලා පැනයක් යොමු කළා.
අපි තැනකට ගියාම එතැන වෙන දේවල් බොහොම අවධානයෙන් බලාගෙන ඉන්නවා. පාරට බැස්සත් එහෙමයි. එම අවස්ථාවන්වලදී ඕනෑ තරම් හාස්‍යෝත්පාදක දේවල් වෙන්න, දකින්න පුළුවන්.
ඒවා තමයි වැඩ සටහන් හරහා අපි ඉදිරිපත් කරන්නේ. එහෙම නැතුව කවදාවත් අපි පැය ගණන් කල්පනා කරකර පිටපත් ලියලා වැඩ සටහන් කරලා නැහැ. අපේ ක්‍රමය දිනපතා අලුත් වෙන එකක්. ඒක නිසා හැමදාම අපිට අලුත් විහිළු තියනවා.
විහිළු කරන අතරතුරදී දෙන්නට කවදාවත් වැඩ සටහන අතරතුරදී හිනා ගිහිල්ලා නැද්ද?
ඒ ප්‍රශ්නය සුනෙත්ට.
කවදාවත් හිනා ගිහිල්ලා නැහැ. එහෙම වෙන්නෙත් නැහැ. අනික ගාමින්දගේ පොලොස් මූණ දකින කොට මට නම් කොහෙත්ම හිනා යන්නෙ නැහැ අනේ.
මේ මේ මේ . . . ඔහේටත් තියෙන්නේ පොලොස් මූණක් තමයි. ඒක නිසා මටත් හිනා යන්නේ නෑ.
සුනෙත්ගේ කතාවට ගාමින්දට එහෙම කියවුණේ ඉබේමයි.
ඔය දෙන්නා සෑහෙන්න කාලයක ඉඳලා එකට වැඩ කරනවා. නොහොඳ නෝක්කාඩු සිත් අමනාපකම් ඇතිවෙලා නැතිද?
අපි දෙන්නා මොකට තරහා වෙනවද? අනික අපිට ඕනෑම වැඩ සටහනකට ආරාධනා කරන්නේ එකට. චූටි මල්ලි ඉන්න තැන පොඩි මල්ලි ඉන්නවා.
පොඩි මල්ලි ඉන්න තැන චුටි මල්ලි ඉන්නවා. දෙන්නා තරහ වුණොත් දෙන්නටම පැවැත්මක් නැහැ කියලා අපිි දන්නවා. ඒක නිසා ප්‍රායෝගිකව ඒ ගැන හිතලා තර්කයක් ආවත් බුද්ධිමත්ව විසඳ ගන්නවා.
ගාමින්ද එහෙම කිව්වේ සුනෙත්ගේ කරට අතක් දා ගන්න ගමං.
ඒ වුණාට සුනෙත් විතරක් තනිවම සුපර් සික්ස් ෆිල්ම් එකේ රඟපෑවනේ?
ඒකටත් අපි දෙන්නටමයි ආරාධනා කළේ.
මට විතරයි යන්න හම්බ වුණේ. ගාමින්දට වෙලාව පිළිබඳ ප්‍රශ්නයක් ඇති වුණා.
බුදු අම්මෝ ආයෙ නම් තනියම රඟපාන්නේ නැහැ නෑමයි. සුපර් සික්ස් තමයි එහෙම මං විතරක් තනියම රඟපාපු පළමු සහ අන්තිම ෆිල්ම් එක.
ඇත්තටම ඔය දෙන්නා මිනිස්සුන්ව හිනස්ස හිනස්ස ඉන්නවා. රැකියාවක් කරන්න බලාපොරොත්තුවක් නැති හැඩයි?
ඉතිං මේක තමයි අපේ රස්සාව. ආයතනවලට කොටු වෙලා මක් කරන්නද? එහෙම අපිට ආස නැහැ. මේ විදිහට ජනතාවගේ මනස සැහැල්ලු කරමින් ජීවිතේ ගෙවනවා. අපි තමයි කට හඬවල් වෙනස් කරලා ගුවන් විදුලි වැඩසටහන් කරන එක දෙවැනි පරම්පරාව ඇතුළේ පටන් ගත්තේ. ඒක ගැන සතුටුයි.
ඒ ගාමින්දගේ වදන්.
දැන් තමයි අපේ කතාබහේ රසවත්ම කොටස. චූටි මල්ලිටයි පොඩි මල්ලිටයි වුණු අපූරු අත්දැකීම් ගැන කියන්නට වෙලාව?
ඔයාට අර මරදානෙදි වෙච්ච සීන් එක කියන්නකෝ මුලින්ම.
සුනෙත්ගෙන් ගාමින්දට ඇරැයුමක්.
අහන්නකෝ වැඩේ. අපි අතරේ ඉන්නවා කතාබහ කරද්දී ඇඟිල්ලෙන් ඇන ඇන කතා කරන මිනිස්සු. මටත් එහෙම කෙනෙක් හම්බ වුණා මරදානෙදි.
ආ මේ අපේ පොඩි මල්ලිනේ . . .
එයා මාව අඳුන ගත්තා.
මේ ඔයාලා කරන විහිළුවල යටි අර්ථයක් තියනවා නේද?
ඇඟිල්ලෙන් මගේ බඩට හයියෙන් අනින ගමන් ඒ මනුස්සයා එහෙම ඇහැව්වේ.
මං නැහැ කිව්වා.
නැහැ කොහෙද? ඔයාලගෙ විහිළුවල යටි අර්ථයක් තියනවා.
ආයෙත් මට ඇඟිල්ලෙන් ඇන්නා.
ඒක නම් මට හොඳටම රිදුනා.
අනේ නැහැ එහෙම යටි අර්ථ මොකටද අපේ විහිළුවලට.
නැහැ යටි අර්ථයක් තියනවාමයි.
තවත් පාරක් හයියෙන් ඇඟිල්ලෙන් ඇන්නා. ඒක නම් මට හොඳටම රිදුනා.
ඔව්. ඔව්, යටි අර්ථයක් තියනවා. ඒක මං හොයාගෙන එන්නම්.
මං බොරු කෙන්තියක් මවාගෙන ඔහුව මග හැරියා.
තව දවසක් මට මරු වැඩක් වුණා.
මගේ වයිෆ්ට කෝල් එකක් ආවා පොඩි මල්ලි තවත් ගෑනු ළමයෙක් එක්ක ඇවිදිනවා කියලා. බැලින්නම් සුනෙතුයි එයාගේ නෝනවයි මේ පුද්ගලයා දැකලා ඔහු හිතලා පොඩි මල්ලි කියන්නේ එයයි කියලා. වෙලාවට එදා මං ගෙදර හිටියේ. නැතිනම් හරිම අකරතැබ්බයක් තමයි වෙන්නේ.
ඔන්න තව දවසක් මට කෝල් එකක් ආවා.
මගෙන් කවුද කින්ද මන්ද මුකුත්ම අහන්නේ නැතුව අනිත් අන්තයෙන් මෙහෙම කියනවා.
මහත්තයෝ ලොරිය කොටයි. කොට දිගයි මොකද කරන්නේ?
මට මුකුත්ම හිතා ගන්න බැහැ. මං ටිකක් පැහැදිලි කරන්න කිව්වා.
මේකයි ප්‍රශ්නේ මහත්තයා එවපු ලොරියට ඊයේ කපපු තේක්ක කොට පටවන්න බැහැ. ඒවා දිගයි. කොට දෙකට කපලා ලොරියට දාන්නද?
මට තේරුණා ඒක මට ආපු කෝල් එකක් නෙවෙයි කියලා. ඉතින් මං ඒ වගක් අගවන්නේ නැතුව ‘හා හා ඔයා දෙකට බැරි නම් තුනට කපලා කොට පටවන්න’ කිව්වා.
ඔය වගේ වැඩක් මටත් උණානේ. සුනෙත් තවත් කතාවකට මුල පිරුවා.
මටත් ආවා කෝල් එකක්.
මහත්තයෝ හෙට ආවොත් අරක ගන්න පුළුවන් නේද?
මොකක්ද?
අර මහත්තයා දෙන්න බැහැ කියපු මුදල?
පුළුවන්, පුළුවන්. එන්න එන්න. මං තවත් කීයක් හරි එකතු කරලා දෙන්නම්.
ඊට පස්සේ මොකද වුණේ කියලා නම් මම දන්නේ නැහැ.
ඔන්න මං දවසක් බස් එකකට නැග්ගා ගමනක් යන්න.
සුනෙත්ගෙන් ආයෙත් කතාවක්.
කොන්දොස්තර එක පාරක් මගේ ගාවට ආව. ටිකට් ගත්තේ නැහැ. තව පාරක් ආවා.
ඒත් සල්ලි ඉල්ලුවෙ නැහැ. මගෙ දිහා හොඳට බලලා යන්න ගියා. තුන්වෙනි පාරත් ආවා. එතකොට මං සල්ලි දුන්නෙ නැහැ. එයා මගෙන් බලෙන් සල්ලි ඉල්ලුවා. මං ඉතින් ආයෙත් සාක්කුවට දාගත්තු සල්ලි අදින ගමන් මං ඇහැව්වා මුලදි සල්ලි ඉල්ලුවෙ නැත්තෙ ඇයි කියලා. එතකොට මේකා කියපි මෙන්න මෙහෙම.
මහත්තයා වගේම කෙනෙක් ටී. වී. එකේ වැඩ සටහනක් කරනවා. මං දෙපාරක්ම රැවටුණා එයා කියලා. ඒකයි සල්ලි නොගත්තේ. මට පස්සේ තමයි කල්පනා වුණේ ටී. වී. එකේ ඉන්න අය බස්වල යන්නේ නැහැ කියලා. ඒකයි සල්ලි ඉල්ලුවේ.
ඒක අහලා ගාමින්දටත් හිනා.
අපට දැන් යන්නත් තියනවා. ඊට කලින් අපි නොදන්න ලයිව් කරන කාලේ වෙච්ච නියම සිද්ධියක් කියන්නම්.
ගාමින්ද සිනහව මැඬ පවත්වා ගනිමින් වාඩි වී සිටි තැනින් නැගිට්ටා.
අපි ටිකක් කැලෑබද ප්‍රදේශයක ගෙදරක රූගත කිරීමක් සිදු කළා. ඒ හරියෙ වන සතුන් ගැවසෙනවා කියලා අපි අසා තිබුණා.
මං නිකමට ඒ ගෙදර අයිතිකාරයාගෙන් ඇහැව්වා සත්තු එහෙම හිටියේ නැද්ද? උන්ව බලන්න බැරිද කියලා.
ගේ හිමියා මරු උත්තරයක් දුන්නේ.
අයියෝ . . . මොකද මහත්තයෝ සත්තු නැත්තේ.
මේ දැනුත් මං පොඩි නයි පැටියෛක් අල්ලගෙන ඇවිත් සාලෙන් අත ඇරියා. ඌ කොහෙට ගියාද දන්නේ නැහැ.
ඒ කතාව අහපු අපිට කැමරා වයර් පෙනුනෙත් නයි පැටව් වගේ. සීතලට කකුලට යමක් ගෑවුණත් බය වුණා. පස්සෙයි දැනගත්තේ ඒ අය සත්තුන්ට කිසිම බයක් නැහැ කියලා.
එහෙනම් අපි ගිහින් එන්නම්.
ආයුබෝවන්!
මං චුටි මල්ලි.
මං පොඩි මල්ලි.
ආයේ දවසක හමුවෙමු ජයවේවා.
මග හමුවන අයට සිනහවක් ද පාමින් ලේක්හවුසියේ කොරිඩෝව දිගේ ඔවුන් දෙපොළ නොපෙනී ගියා.
source-http://www.sarasaviya.lk

Senasuru Maruwa -- චන්න අයියාගේ දෙබස්වලට මට ඇත්තටම ඇඬුණා

සෙනසුරු මාරුවේ අනුත්තරා සමඟ කතාබහක්

ඇය අනුත්තරා. චාම්, අහිංසක, සංවේදී සරල ජීවිතයක් ගත කරන තරුණියක්. අනුත්තරා කෝටිපති ව්‍යාපාරිකයකුගේ එකම දියණිය. මොන තරම් සැප සම්පත්, ධනය තිබුණත් ඇය ජීවත් වෙන්නේ කියාගන්න බැරි තරම් දුකක් හිතේ හිර කරගෙන.
මේ අනුත්තරා ඉන්නේ නම් මේ දිනවල තිරගත වන උදයකාන්ත වර්ණසූරියගේ නවතම චිත්‍රපටය වන සෙනසුරු මාරුව චිත්‍රපටයේ. අනුත්තරාට පණ පොවන්නී ශේෂාද්‍රි . මේ ශේෂද්‍රි සමඟ කළ සුන්දර කතාබහක්.
සෙනසුරු මාරුවේ අනුත්තරාගෙ චරිතය ඔබට දැනුණේ මොන වගේද?
අනුත්තරා කියන්නේ ධනවත් පවුලක අහිංසක තරුණියක්. ඇය සරල සාමාන්‍ය ජීවිතයක් ගත කළත් ඇත්තටම ඇය ජීවත් වෙන්නේ දැඩි මානසික පීඩනයකින්. ඒකට ගොඩක්ම බලපෑවේ තමන්ගේ තාත්තා. තාත්තාගේ දැඩි ක්‍රියා කලාපය හේතුවෙන් අනුත්තරාට ඇගේ ආදරය පවා අහිමි වී යනවා. ඒත් පසුකාලීනව තාත්තාට ඔහුගේ වැරැදි තේරුම් කරලා දෙන්න අවස්ථාව මේ අනුත්තරාට ලැබෙනවා. මේ දුව මෙම අවස්ථාවේදී හරිම අපූරු විදියට එය තාත්තාට තේරුම් කරල දෙනවා. අද සමාජයේත් අනුත්තරාලා ඇත්තටම ජීවත් වෙනවා.
මේ අවස්ථාව ඔබට ලැබුණේ?
මුලින්ම මම චිත්‍රපට ක්ෂේත්‍රයට හඳුන්වා දුන්නේ උදයකාන්ත වර්ණසූරිය මහත්මයා. උදය අංකල් මුලින්ම මට චැලෙන්ජර්ස් චිත්‍රපටය සඳහා ආරාධනා කළා. ඒ අතරතුර චැලෙන්ජර්ස් තිරගත වෙන්නටත් ප්‍රථම තමයි ඔහු සෙනසුරු මාරුව චිත්‍රපටය සඳහා මට ආරාධනා කළේ. චැලෙන්ජර්ස් සඳහා ප්‍රතිචාර ලැබෙන්නටත් කලින් මට ඔහුගේ මීළඟ චිත්‍රපටයට ආරාධනා කළේ මං ගැන ඇති විශ්වාසය නිසා. ඒ ගැන ගොඩක් සතුටුයි.
චැලෙන්ජර්ස් චිත්‍රපටයේ චරිතය සමඟ සසැඳීමේදී මෙම චරිතය නිරූපණය ගැන මොකද හිතෙන්නේ?
මේ චිත්‍රපට දෙකේ චරිත දෙක දෙවිදියක්. ඒ අනුව සෙනසුරු මාරුව චිත්‍රපටයේ අනුත්තරා කියන චරිතය ටිකක් සංකීර්ණයි. චැලෙන්ජර්ස් චිත්‍රපටයේ චරිතය නම් මට ගොඩක් සංකීර්ණ වුණේ නැහැ. ඇත්තටම මට ඒක දැනුණේ මගේ සැබෑ ජීවිතය විදියට.
මම එහි රංගනයේ යෙදෙනවාට වඩා පෙනී හිටියා වගේ තමයි දැනුණේ. ඒ චරිතය මට බොහෝ සමීප වූ නිසා හරිම සැහැල්ලුවෙන් තමයි නිරූපණය කළේ. නමුත් සෙනසුරු මාරුව චිත්‍රපටයේ අනුත්තරාගේ චරිතය ඊට හාත්පසින්ම වෙනස් වූ චරිතයක්. පිටපත ලැබුණම මම ඒක බලලා ගොඩක් අධ්‍යයනය කළා. ඒ තුළින් අනුත්තරා කියන චරිතය මා ගොඩ නඟා ගත්තා. උදය අංකල් මට ඒ සඳහා ගොඩක් උදව් කළා. ඒ නිසා මට ඒක එතරම් අසීරු කාර්යයක් වුණේ නැහැ. මං හිතනවා එය සාර්ථක වුණා කියලා.
අනුත්තරා ගොඩක් ඇඬුවා නේද?
අනේ ඔව්. අනුත්තරාට ඇගේ පියාගේ දැඩි ක්‍රියා කලාපය හේතුවෙන් ආදරය අහිමි වී යනවා. මොන තරම් සැප සම්පත් තිබුණත් එදා සිට ඇයට ජීවිතය ගත කරන්න වෙන්නේ ඇඬූ කඳුළින්. ඇය ජීවත් වුණේ ආදරය අහිමිවීමේ වේදනාව හිතේ තියාගෙන. පසුව ඇයට මුහුණ දෙන්නට සිදු වූ දේවල් නිසා අනුත්තරා ගොඩක්ම ඇඬුවා. ඉතිං සමහර අවස්ථාවලදී මට ඇත්තටම ඇඬුණා. චන්න අයියාගේ සමහර දෙබස් ගොඩක් සංවේදීව දැනුණා. ගොඩක් දුක හිතුණා.
සෙනසුරු මාරුව චිත්‍රපටයේ රූගත කිරීම් අතරේදී අමතක නොවන සිදුවීම් එහෙමත් සිදුවන්නට ඇති නේද?
අපි බොහෝමයක් රූගත කිරීම් කළේ මුලතිව්වලදී. එහි ෆාරා 3 නැවේ කළ රූගත කිරීම්වලදී ටිකක් බය හිතුණා. රූගත කිරීම් අතරතුරේදී නැව කඩා වැටෙයි ද කියලා හරිම බයෙන් තමයි හිටියේ.
ඔයාගේ අක්කා දිනක්ෂි නම් මේ වන විට සහාය අධ්‍යක්ෂණයට පිවිසිලා තියෙනවා. ශේෂද්‍රි‍්‍ර ඔයත් ඒ පැත්තට යොමු වෙන්න අදහසක් එහෙම නැද්ද?
අධ්‍යක්ෂණය පැත්තට යොමු වෙනවා කියන්නේ ලෙහෙසි පහසු පොඩි දෙයක් නෙවෙයිනේ. මම පොඩි කාලේ ඉඳලම ඇලුම් කළේ රංගනයට. අක්කාට නම් අධ්‍යක්ෂණ කටයුතුª සඳහා යොමු වෙන්න ආසාව තිබුණා. ඒ වගේම එයාට තාක්ෂණික අංශය ගැන හොඳ දැනුමක් තියෙනවා. මොන දේ කරන්න වුණත් ඒ පිළිබඳ හොඳ දැනුමක් තියෙන්න ඕන. මම තවම ක්ෂේත්‍රයට ඇවිල්ලත් වැඩි කාලයක් ගත වෙලත් නැහැනේ.
ඔයාගේ අදහස චිත්‍රපටවල විතරක්ම රඟපාන්නද?
මම ගොඩක්ම ආස චිත්‍රපටවල රඟපාන්න. මම ටෙලි නාට්‍ය එපා කියනවා නෙවෙයි. පොඩි කාලේ ඉඳලම ආසා කලෙත් චිත්‍රපවලට. ඒ වුණාට ටෙලි නාට්‍ය ආසාවෙන් බලනවා. අක්කා නම් ගොඩක්ම කැමැති ටෙලි නාට්‍යවල රංගනයට තමයි.
රංගන කටයුතු සඳහා ගෙදරින් ලැබෙන සහායත් කියමු?
අම්මා, තාත්තා වගේම අක්කා සහ නංගිගෙනුත් ගොඩක් උදව් ලැබෙනවා. මට වඩා අක්කා ටෙලි නාට්‍ය සමඟ සම්බන්ධ වෙලා කටයුතුª කරනවානේ. මට තිර පිටපතක් ලැබුණම අක්කා එක්ක තමයි සාකච්ඡා කරන්නේ. එයා ඒ ගැන උපදෙස් දෙනවා. ඒක මට ලොකුª ශක්තියක්.
source-http://www.sarasaviya.lk

Aponsu in Colombo

අපොන්සුගේ සකෝ දේවා කොළඹ එයි

ජයසේකර අපොන්සු කියන අපේ නාට්‍යකරුවා ඔහුගේ නවතම වේදිකා නාට්‍යය වුණු ‘සකෝ දේවා’ ත් සමඟ පසුගිය දවස්වල රට වටේම යන බව අපට ආරංචි වුණා. ඔහු මේ සූදානම් වෙන්නේ කොළඹ ප්‍රදේශයෙන් ඈත රඟහලවල වේදිකා ගත කළ ‘සකෝ දේවා’ වේදිකා නාට්‍යය පළමුවරට කොළඹ වේදිකාවක රඟ දක්වන්නයි. ඒ මෙම මස 14 වැනිදා ඉරිදා ආනන්ද විද්‍යාලයීය කුලරත්න ශාලාවේදීයි.
වර්තමාන සමාජ විෂමතාවය සහ එවැනි වාතාවරණ සිදුවීමට – අතීතයේ සිට මිනිසුන් පොට වරද්දා ගත් තැන් පිළිබඳ කෙරෙන විමසුමක් ‘සකෝ දේවා’ නාට්‍ය ඔස්සේ ජයසේකර අපොන්සු කතාබහ කිරීමට ලක් කරනවා.
බන්දුල විජේවීර, හසිත ශ්‍රී ගුණවර්ධන, තුසිත වීරසිංහ, සූරිය බණ්ඩාර, ගාමිණී කුලරත්න, ගාමිණී කුලසේකර, නදීකා හෙට්ටිආරච්චි, පුබුදු වල්පිට, සුමිත් සුභසිංහ, ඉරේෂා නාමලී වෙත්තසිංහ, ප්‍රභාෂිනී දන්තනාරායන, ප්‍රභා දුෂාන්ති යන ශිල්පීන් ‘සකෝ දේවා’ වේදිකා නාට්‍යයට රංගනයෙන් සහාය වෙනවා. එහි සංගීතය ජගත් වික්‍රමසිංහගෙන්. ගීත රචනය සමන් චන්ද්‍රනාත් වීරසිංහයි. ‘සකෝ දේවා’ නාට්‍යය නිෂ්පාදනය හා රචනය සිදු කරන්නේ ජයසේකර අපොන්සු විසින්මයි.
 

Poddanta Puluwan

තවත් ලෝක ළමා දිනයක් අවසන් විණ. එදින පැවති පොඩිත්තන්ගේ හැකියාවන් කලඑළියට ආ අවස්ථාවන් රැසක් මගේ නෙත ගැටිණ. මම මොහොතක් කල්පනාවෙහි නිමග්න වීමි. ඇත්තෙන්ම මා දුටු ඇතැම් ළමෝ අති දක්ෂයෝය. කුසලතාවයන් අතින් කෙළ පැමිණියෝට වඩා ඔවුන්ගේ සහජ දක්ෂතාවයන් අකුණු සැර මෙන් ප්‍රබලය. කෙටියෙන්ම පැවසුවොත් අපේ පොඩ්ඩෝ අනාගතය දිනන්නෝ බව පැහැදිලිය.
මා මේ කියන්නට සැරසෙන කතාවට එලෙස ප්‍රවේශයක් ගත්තේ පොඩ්ඩන් හා සබැෙඳන අපූරු ගමනක් යාමට පෙරය. ඇත්ත වශයෙන්ම එය ඇඟට දැනෙන බොහොම ආශ්වාදජනක ගමනක්ය. මා මීට ප්‍රථම සංචාරය කළ කිසිදු දර්ශන තලයකින් නොවිඳි අත්දැකීම් රැසක් මෙතැනදී ලැබෙනු නොඅනුමානය.
මෙවර මා චාරිකා කරන භූමියේ සිටින්නේ පොඩ්ඩෝය. ඔවුන් තුළින් විද්‍යාමාන වූ උපමා උපහැරණ සහිතව පෙන්වා දිය හැකි ආනන්දනීය කලා හැකියාවන් ගැන දැන් මුලු රටම දනිති. සත් අන්තයේ හෙවත් සෙනසුරාදා සහ ඉරිදා දිනයන්හී රාත්‍රී නවයට සිරස නාලිකාවෙන් දිග හැරෙන ‘පොඩ්ඩන්ට පුළුවන්’ මගේ අද ගමනාන්තයයි.
එය මේ වන විට අතිශය ජනාදරයට පත් වූ වැඩසටහන් බවට වාදයක් නැත. ‘පොඩ්ඩන්ට පුළුවන්’ හි තිරය පිටුපස වැඩසටහන තරමටම මනරන්ජනීයය. එලෙස මට සිතුණේ වැඩසටහන පටිගත කෙරෙන සිරස ස්ටයින් මැදිරිය හි ඇතුළටත් යාමට ප්‍රථම එහි දොරටුව අභියසට ආසන්නයට පැමිණි මොහොතෙහි විඳි සිත් අලවන අත්දැකීමක් නිසාය.
පුංචි රුවන් පුංචි රුවන් පුංචි කාලේ
වතුර අරන් ළිඳ උඩ තැබුවාය කලේ
අට පහ නොදන්නා කොල්ලෙකි මේක කළේ
ගෙදර යන්න දෙනවද මට පුංචි කලේ
ගජමන් නෝනාගේ රචනයක් වූ එය ගැයුවේ ද අට පහ නොදන්නා පුංචි දැරිවියක්ය. එවැනි විචිත්‍ර වූත්, පැරැණි වූත් කවියක් අට පහ දන්න අයකුට වුව ද මතක තබා ගත හැකි යයි සැකයකි. මා එම පුංචි බට්ටියගෙන් තවත් කවියක් අසා ගැනීමේ රිසියෙන් ඇය වෙත ගියෙමි. මා එන වග දුටු ඈ මැදිරියේ පළමු දොර විවෘත කොට එවන්ම වූ තවත් පිරිසකට එකතු විය. ඒ වන විටත් ‘පොඩ්ඩන්ට පුළුවන්’ තරඟ වැඩසටහනක් රූගත කිරීමට සැරසෙමින් තිබුණි.
අලියන්ටයි ළමයින්ටයි එක තැන එක විදිහට ඉන්න බැහැ. මේ කියමන සියයට දාහක් ඇත්ත බව මට පසක් වූයේ එදාය. අවසන් වටයට තේරී පත්ව සිටිනා ළමුන් දොළොස් දෙනාගෙන් හත් දෙනෙකු සහ ඔවුන්ගේ කණ්ඩායම වේදිකාවේ පසෙක වාඩි වී කිචිබිචි ගාමින් සිටිති.
ඇතැමෙක් තවත් කෙනෙකුගේ නහයෙන් අදිමින් බොරු රණ්ඩුවක් මවා ගැනීමට උත්සාහ කළේය.
වැඩසටහනෙහි අධ්‍යක්ෂ ප්‍රදීප් මහේෂ් ලියනගේ ඇතුළු පිරිස මහත් සංයමයකින් යුතුව ඔවුන්ව පාලනය කරන අන්දම අගය කළ යුතුය.
හොඳයි බබාලා . . . අපි දැන් රෙකෝඩින් එක පටන් ගන්න හදන්නේ . . .
ඒ වන විට ද රන්ජන් රාමනායක, සංගීතා, තදානි සහ නිමන්ත හේෂාන් ගමගේ සූදානමනි.
පුංචි විශේෂත්වයක් කිරීමේ අරමුණෙන් කුසලානි නෙත්මා පොඩිත්තියගේ නර්ථන කණ්ඩායමට මැදිව රන්ජන්ව වේදිකාවේ සිට විනිසුරු අසුනට ගෙන ඒමට ප්‍රදීප් තීරණය කළේය.
රන්ජන් වේදිකාවේ මැද එක් දණහිසක් තබා වාඩි විය. නර්ථන කණ්ඩායම ඔහුව නොපෙනෙන්නට ආවරණය කළෝය. මෙය බලා සිටි පොඩිත්තෙකුගේ හඬ අවදි වූයේ ඉබේමය.
රන්ජන් මාමේ, ඔබ මොකද කරන්නේ.
ඔහුගේ ළපටි හඬට රන්ජන් නොදැනුවත්වම හිට ගත්තේය.
රන්ජන් මාමා හිමින් මතු වෙලා එන්න හදන්නේ.
රන්ජන් ඊට පිළිතුරු සැපයීය.
අනේ ඇත්තද? රන්ජන් මාමා පොළව පලාගෙන ගැඩවිලෙක් වගේ මතුවෙලාද එන්න හදන්නේ?
දැන් මුලු සභාවම සිනාසෙන්නේය.
අන්න ඒ අයිඩියා එක මරු. පුතා දිගටම ආයෙත් එහෙම කතා කරන්න. තවත් දෙබස් කිහිපයක් ලියා දී එලෙස රූගත කිරීම අරඹන ලදී. මෙහි නිවේදක සම්පත් ජයසිංහ අද දමිල ඇඳුමින් සැරසී සිටින්නේය. ඔහු දමිල සහ සිංහල බසින් නිවේදනය කොට නර්ථනයෙන් පෙළහර පාන ඉරෝෂ් නිමේෂ්ට වේදිකාව භාර කළේය.
ඔහු පංජාබ් බෙර වාදනයක් සමඟ ඉන්දියානු සම්ප්‍රදායට සැරසී ඊට අයත් ගීයකට නර්ථනය පටන් ගත්තේය.
දැන් ගීතයේ අඩක් ගෙවී ගොසිනි. හදිසිියේම ඉරෝෂ්ගේ හිසෙහි තිබුණු තලප්පාවක් බඳු කුඩා තොප්පිය බිම වැටුණේය. රූගත කිරීම නැවතුණේය. දෙවන තෙවන වර ද වුණේ එසේමය.
ඒක ඔළුවට තියලා පුංචි ඇණයක් ගැහුවා නම් හරි. තලප්පාව වැටීම බලා සිටිය නොහැකි තැන පොඩිත්තෙක් කීවේය.
මුලු සබාවම දැන් සිනහ සයුෙර්ය. පසෙකින් සිටින ළමුන්ගේ මව්පියෝ ද තම කටකාරයින් ගැන සතුටින් පසු වන බව මට දැනුණේය.
හරි දැන් අපි කෙටි විරාමයකට යමු.
ඉඩෙ . . . ඉඩෙ . . . ඉඩෙ . . .
සම්පත් දමිළ බසින් කියන්නට හැදූ වාක්‍ය පැටලුණේය.
කෙනෙකු වහ වහා ඔහුට වතුර වීදුරුවක් ගෙනත් දුන්නේය. ඉන් පසු ඔහුගේ වචන පැටලුම් ලිහුණේය.
ඉඩෙයි වේලක්ක පිරග සන්දිප්පෝම්
(විරාමයෙන් පසු නැවත හමු වෙමු)
විවේකයදී ළමෝගේ කංකෙඳිරිය වැඩිය. ඔවුන් මව්පියන් ළඟට දුවගොස් කන්නට බොන්නට යමක් ඉල්ලා සිටියහ.
මේ ළමයට ආයේ බඩගිනි වෙලා. දැන් ටිකකට කලින්නේ කෑවේ.
මවක් තම පුතුට පවසන්නීය.
අනේ අම්මේ මං ඒවා කෑවේ බඩේ පණුවන්ටනේ. දැන් ඕනේ මට . . .
එවදන් කොතරම් උපහාසාත්මකදැයි මට සිතිණ.
උහිරේ . . . උහිරේ . . .
විවේකයෙන් පසු වේදිකාව භාර වූයේ අන්ජන යසිරුටය. ඔහු අප සැවොම ක්ෂණයකින් වසඟයට ගත්තේය.
ඊළඟට ආමිනා රහ්මත් ඉදිරිපත් කළ වළලු කරකැවීම් අංගය දෙස අප බලා සිටියේ විස්මිත වූ දෑසිනි.
කවුශාලගේ සහ රිද්මිගේ ගායනය, කුසලානිගේ නර්ථන කණ්ඩායම, සරිත් සහ සුරිත් යන දෙසොහොයුරන්ගේ අදහාගත නොහැකි ගිටාර් සහ ඩ්‍රම්ස් වාදනය අපව අමන්දානන්දයට පත් කළෝය.
මේ අයගේ නැටුම් බලලා ෂාරුක් මට කෝල් කරලා ඇඬුවා. ඉන්දියාවට මෙයාලව එවන්න එපා කිව්වා. ඒගොල්ලන්ට තැන නැතිව යයි කියලා.
විනිසුරු අදහස් දැක්වීමේදී රන්ජන් කීවේය.
මේ වගේ පොඩ්ඩො ලංකාවේ ඉන්නවද කියලත් පුදුමයි.
ළමා මනෝ විද්‍යාව පිළිබඳ උපදේශිකාවක් වන සංගීතා පවසන්නීය.
ඔයාලා හොඳ අපේ සිංහල සිනමාවට.
නර්ථනයෙන් පෙළහර පෑ අයට යොවුන් සංගීතවේදී කථිකාචාර්ය නිමන්ත හේෂාන් ගමගේගෙන් ඇරයුමකි. සැබවින්ම මේ දඟයන් නොබෝ දිනකින්ම අප කලා ක්ෂේත්‍රයට පා තැබිය යුතුමය. මෙවැනි ආශ්චර්යමත් හැකියාවන් ඇති දුවා දරුවන් මෙරටට සම්පතක් වන්නේය. මෙම අදහස් කල්පනා කරමින් මා මැදිරියෙන් පිටතට පැමිණීමට හැදුවේය.
මාමාට බොහොම ස්තුතිය අපව බලන්න ආවාට.
සභයේ සියල්ලෝම එක්හඬින් පැවසීය.

Gayle's gangnam style

ක්‍රීඩා පිටියත් උමතු කළ 'ගන්ග්නම්' රැල්ල

20 – 20 ලෝක ක්‍රිකට් කුසලානයේ අවසානයේ අපට ජය අහිමි වුවත් බටහිර ඉන්දීය කොදෙව් ක්‍රීඩකයන්ගේ කෞශල්‍ය හා ඔවුන්ගේ කණ්ඩායම් හැඟීම පිළිබඳ අපේ බොහෝ දෙනා කතා කළේ සතුටිනි. එදා තරගය අවසානයේ ක්‍රිස් ගේල් ඇතුළු පිරිස කළ නර්තනය කාගෙත් සිත් ගත්හ.
ගන්ග්නාම්. මේ අද සංගීත ලොව කලඹන නවරැල්ලයි. බිළිඳාගේ සිට මහල්ලා දක්වා කිසිදු වයස් සීමාවක් නොමැතිව ලොවම ග්‍රහණය කරගත් ගන්ග්නාම් කුමක් ද? එය, නව පරපුරේ අලුත්ම නර්තන ශෛලියකි. මුළු සිරුරම රිද්මයානුකූලව නලවමින් අශ්වයකු පදවන අයුරු පෙන්වන ගන්ග්නාම් ශෛලියේ මූලාරම්භය සිදු වූයේ දකුණු කොරියාවේ ගන්ග්නාම් දිස්ත්‍රික්කයෙනි. එහි වෙසෙන සාමාන්‍ය ජනතාව විසින් විනෝදයට නිර්මාණය කළ මේ නැටුම් ශෛලිය මුළු ලොව වෙත ගෙන ගියේ ‘සඉස්’ නම් වූ දකුණු කොරියානු ජනප්‍රිය ගායන ශිල්පියාය.
ඔහු ගීත රචකයෙකි. තනු නිර්මාණ ශිල්පියෙකි. පාක් ජායි සෑන් හෙවත් ‘සඉස්’ නමින් හඳුන්වන ඔහු විසින් ‘ගන්ග්නාම්’ නම් වූ ගීතය ගයමින් ඉදිරිපත් කළ මනහර රංගනය ගීත ලෝලීන් තුළ පෙරළියක් ඇතිකර තිබේ. සඉස් විසින් නිරූපණය කරන ලද එම ගීතමය රංගනය නිකුත් වූයේ මේ වසරේ ජූලි මස 15 දාය. එය ඇතුළත් වූයේ ඔහුගේ 6 වැනි ගීත එකතුවෙහිය.
එය Best 6th Part One ලෙස හඳුන්වා දී තිබුණි. මෙම සංගීතමය වීඩියෝව මේ වන විට අන්තර් ජාලයේ යූ-ටියුබ් ඔස්සේ නරඹා ඇති ප්‍රේක්ෂක සංඛ්‍යාව මිලියන 345 කට වැඩි යැයි වාර්තා වී තිබේ. යූ ටියුබ් වෙබ් අඩවියෙන් මෙතෙක් නිකුත් වූ වීඩියෝ ගීත අතරින් වැඩි පිරිසක් නැරඹූ ගීතය මෙය යැයි සැලකේ. ඒ නිසාම මෙම ‘ගන්ග්නාම්’ ගීතය ගිනස් වාර්තා පොතට ද ඇතුළත් වී තිබේ.
මෙම ගීතයෙහි මුසු වී ඇත්තේ අංග සම්පූර්ණ පෙම්වතියක පිළිබඳ තරුණයකුගේ සිහින සිතුවමකි. තරුණයා විමසන්නේ තම පෙම්වතිය දඟකාර මෙන්ම ශිෂ්ට සම්පන්න යුවතියක වන්නේ කවදාදැයි යනුවෙනි. ගීතයේ නැවත නැවත කියැවෙන කොටසක් තිබේ. එය නම් ‘ඔප්පා’ නම් වූ වචනයයි.
කොරියානු බසින් ‘ඔප්පා’ යනු කාන්තාවක විසින් තමන්ගේ වියපත් පිරිමි මිතුරා හෝ තම වැඩිමහලු සොහොයුරා හඳුන්වනු ලැබීමට භාවිත වන වචනයකි. මෙම ගීතයෙහි දර්ශනවල ‘ගන්ග්නාම්’ නර්තනයෙහි යෙදෙමින් ගායක සඉස් නිරූපණය කරන්නේ අශ්වයකු පිට නැගී ගමන් කරන ආකාරයයි.
හාස්‍යොත්පාදක රංගනයක යෙදී සිටින ඔහු වරින් වර විශේෂ ඇඳුම් වර්ග කිහිපයක් හැඳ, කළු අව් කණ්ණාඩියක් පැලඳ නිරූපණය කරන හාස්‍යජනක රංගනයට කොරියානු සංස්කෘතියේ ඇතැම් අංගයන්ද එකතු වී තිබේ. මෙම ගීතයේ සමහර දර්ශන රූපගත කර ඇත්තේ දකුණු කොරියාවේ ගන්ග්නාම් දිස්ත්‍රික්කයෙහිය. මෙහි ඇති තවත් විශේෂත්වයක් වන්නේ පස් හැවිරිදි කුඩා දරුවකු ඉදිරිපත් කරන රංගනයයි. පුංචි නර්තන ශිල්පියා ද ගීතය නිසා එක රැයින්ම ජනප්‍රිය වූයේය.
මෙම ගීතයෙහි දර්ශනවලට දකුණු කොරියාවේ සංගීත කණ්ඩායම්වල ශිල්පීන්, රූපවාහිනී විකට ශිල්පීන් සහ නිවේදක නිවේදිකාවන් ද රංගනයෙන් දායක වී ඇත. මෙම ගීතයත් සමඟම ගන්ග්නාම් නර්තන ශෛලියට අති විශාල ජනප්‍රියත්වයක් හිමිවීමට ගීතයේ රිද්මය, නර්තනය මෙන්ම තවත් කරුණක් ද බලපා ඇත. එය නම්, මෙම ගීතයට ‘හිමිකම් ඇවිරිණි’ යන සීමාව පනවා නොතිබීමයි. මෙය ලොව පුරා ඕනෑම අයකුට අනුකරණය කිරීමට ඉඩ ලැබී තිබේ.
මේ හේතුව නිසා අද වන විට ගන්ග්නාම් නර්තන ශෛලිය නිරූපණය කරන විවිධාකාර ගීත පැටව් ගසා ඇති බව විචාරකයෝ පවසති. කෙසේ වෙතත් ගීතය ඉදිරිපත් කළ සඉස්, මේ අනුකරණය කරන්නන්ට එරෙහිව කිසිදු නීතිමය පියවරක් ගෙන නැත. මේ නිදහස නිසා ගන්ග්නාම් නර්තන ශෛලිය ඉගෙන ගන්නටත් තම තමන්ගේ වීඩියෝ නිර්මාණවලට එක් කර ගන්නටත් බොහෝ රටවල ගායක ගායිකාවන් තුළ ඇත්තේ පුදුමාකාර උනන්දුවකි. ගායක ගායිකාවන් පමණක් නොව රූපවාහිනී නිවේදක නිවේදිකාවන් ද මේ නර්තන ශෛලිය පුහුණුවීමට දැඩි උනන්දුවක් දක්වන බව ලොව නන් දෙසින් අසන්නට ලැබෙයි.
එක් අවස්ථාවකදී මෙම ගායන ශිල්පියා ‘බිග් මෝනින් බස්’ නම් වූ ජනප්‍රිය දකුණු කොරියානු රූපවාහිනී වැඩ සටහනට සහභාගි වූ විට එය මෙහෙය වූ නිවේදක නිවේදිකා දෙපළට ද ගන්ග්නාම් නර්තනය උගන්වන්නට සිදු වූයේය. තවත් අවස්ථාවකදී සඉස්, කැලිෆෝනියා ප්‍රාන්තයේ සංචාරය කරද්දී ජනප්‍රිය සුපිරි ගායිකා බ්‍රිට්නි ස්පියර්ස් මුණ ගැසුණි. ඇය ඔහුගෙන් ඉල්ලා සිටියේ ගන්ග්නාම් ශෛලිය තමන්ට ද පුහුණු කරවන ලෙසය. ජාත්‍යන්තර සී. එන්. එන්. රූපවාහිනී නාලිකාවේ මාධ්‍යවේදිනියක වන ෂැනන් කැක් පැවසුවේ තමන් මෙම ගන්ග්නාම් නර්තනය ඇතුළත් දර්ශනය 15 වතාවක් නැරඹූ බවය.
ඇමරිකානු විකට ශිල්පිනියක වන චෙල්සී ලේට්ලි පැවසුවේ සඉස් දකුණු ඇමරිකානු සුපිරි ගායක රිකී මාටින්ට සමාන කළ හැකි බවය. ගන්ග්නාම් නර්තන ශෛලියට වශී වී සිටින්නේ යොවුන් පරපුර පමණක්ම නොවේ. වයෝවෘද්ධ පිරිස් ද මෙම නර්තන ශෛලියට බෙහෙවින්ම ඇලුම් කරන බව දැනගන්නට තිබේ. පසුගිය සැප්තැම්බර් මාසයේදී දකුණු කොරියාවේ පැරඩයිස් පාක් නම් වූ නිවහනේහි රැඳී සිටින වැඩිහිටියන් ද මෙම නර්තනය නැරඹීමට දැඩි කැමැත්තක් දක්වන බව පැවසේ.
ගන්ග්නාම් නර්තන ශෛලිය මෙතරම් ජනප්‍රිය වීම නිසා සඉස් පසුගියදා දකුණු කොරියාවේ ගන්ග්නාම් දිස්ත්‍රික්කයේ බලධාරින් පිරිසක් විසින් ගෞරව සම්මානයක් ද පුදනු ලැබීය. ගන්ග්නාම් නර්තන උණුසුම යාබද උතුරු කොරියාවට ද දැනී ඇත. එරට රජයේ නිල වෙබ් අඩවියට ද සඉස් ඉදිරිපත් කළ ගන්ග්නම් ගීතයට සමාන ගීතමය රංගනයක් එක් කර ඇත්තේ ඒ උණුසුම නිසාමය. එහෙත් එම රංගනය සඉස් ගේ රංගනයට කිසිසේත්ම සමාන කළ නොහැකි යැයි ‘නැෂනල් පෝස්ට්’ පුවත්පත සඳහන් කර ඇත.
source-http://www.sarasaviya.lk

බලනවා නම් චිත්‍රපට

අද ලොව ජනප්‍රිය චිත්‍රපට ඩී. වී. ඩී. මගින් දැක ගන්න ඔබට අත්වැලක් වෙන්නයි මේ වෑයම.

MEN IN BLACK 3

‘මෙන් ඉන් බ්ලැක් 3’ මෙන් ඉන් බ්ලැක් චිත්‍රපට මාලාවේ අලුත්ම චිත්‍රපටයයි. විනෝදාත්මක විද්‍යා ප්‍රබන්ධ චිත්‍රපටයක් වන මෙහි අධ්‍යක්ෂණය බැරී සෝනිෆීල්ඩ් විසිනි. ලෝවෙල් කනින්ග්හ්ම්ගේ ද මෙන් ඉන් බ්ලැක් හාස්‍යමය කෘති පෙළ ඇසුරින් මෙම චිත්‍රපට නිර්මාණය කර ඇත. විල් ස්මිත්, ටොම් ලී ජොන්ස්, ජෝෂ් බ්‍රෝලින් මෙහි ප්‍රධාන චරිත නිරූපණය කරති.

FRANKENWEENIE

‘ප්‍රෑන්කන්විනි’ ත්‍රිමාණ කළු - සුදු විද්‍යා ප්‍රබන්ධ චිත්‍රපටයකි. කුඩා ළමයකු වටා ගෙතුණ මෙම චිත්‍රපටයේ අධ්‍යක්ෂණය ටිටි බර්ටන් විසිනි. චාර්ලි තාන්, ෆ‍්‍රෑන්ක් වේල්කර්, වියෝනා රේඩර් ඇතුළු පිරිසක් මේ සඳහා හඬ දායකත්වය ලබා දෙති.

HOTEL
TRANSYLVANIA

‘හොටෙල් ට්‍රැන්සිල්වේනියා’ ඩ්‍රැකියුලා පිළිබඳ කතා පුවතක් අඩංගු පරිගණක සජීවිකරණ විනෝදාත්මක චිත්‍රපටයකි. ජෙන්ඩි ටාර්ටාකොව්ස්කිගේ අධ්‍යක්ෂණයක් වන හොටෙල් ට්‍රැන්සිල්වේනියා හි ඇඩම් සැන්ඩ්ලර්, සෙලීනා හෝම්ස්, ඇන්ඩ් සම්බර්ග්, කෙවින් ජේමිස්, ෆ‍්‍රාන් ඩ්‍රෙස්චර්, මෝලි ඇනෝස් සහ ඩේවිඩ් ස්පෙඩ් හඬ දායකත්වය ලබා දෙති.

BARFI

අනුරාග් බාසුගේ අධ්‍යක්ෂණයක් වන ‘බාෆි’ විනෝදාත්මක හින්දි චිත්‍රපටයකි. ගොළු - බිහිරි පිරිමි තරුණයකු සහ තරුණියන් දෙදෙනකු වටා ගෙතුන අපූරු කතාවක් බාෆි හි ඇතුළත්වේ. රන්බීර් කපූර්, ප්‍රියන්කා චොප්රා සහ එලිනා ඩිකෲස් මෙහි ප්‍රධාන චරිත නිරූපණය කරති. පසුගිය සැප්තැම්බර් 14 වැනිදා තිරගත වීම ආරම්භ කළ බාෆි 85 වැනි ඇකඩමි සම්මාන උළෙලේ හොඳම විදේශීය චිත්‍රපට නාමාවලිය සඳහා නිර්දේශ වී ඇත.

OH MY GOOD

‘ඔහ් මයි ගෝඩ්’බොලිවුඩ් සිනමාවේ බිහිවුණ නවතම උපහාසාත්මක විකට චිත්‍රපටයකි. හින්දු ප්‍රතිමා අලෙවි සලක් පවත්වාගෙන යන වෙළෙන්දකු වටා මෙහි කතාව ගෙතී ඇත. උමේෂ් ෂුක්ලා අධ්‍යක්ෂණය කරන ඔහ් මයි ගෝඩ් හි ආක්ෂේ කුමාර්, පාරේෂ් රාවල්, ලුබ්නා සලීම්, මිථුන් චක්‍රබෝර්ති, පූනම් ජාවර්, මහේෂ් මන්ජේකර් ඇතුළු පිරිසක් රංගන දායකත්වය ලබා දෙති. තවද ප්‍රභූ දේවා සහ ශෝනක්ෂි සින්හා මෙහි විශේෂ ගීතමය ජවනිකාවක් සඳහා පෙනී සිටීති

TAKEN 2

‘ටේකන් 2’ සිත් කම්පා කරවන සිදුවීමක් රැගත් ක්‍රියාදාම චිත්‍රපටයකි. මේ දිනවල තිරගත වන ටේකන් 2 අධ්‍යක්ෂණය ඔලිවර් මෙගෑටෝන් විසිනි. ලියමි නීසන්, මැගේ ග්‍රේස්, ෆාමිකේ ජෙන්සන් ඇතුළු පිරිසක් මෙහි චරිත සඳහා පණ පොවති.
source- http://www.sarasaviya.lk

කිසිම තරඟයකින් ජනප්‍රිය වෙන්නට බැහැ

සිරස කුමරිය පවනි සමඟ කළ පළමු කතාබහ

සිරස කුමරිය දෙවන අදියර පසුගිය සෙනසුරාදාවේ අවසන් වුයේ පවනි මධුශානි සිරස කුමරිය ලෙස අභිෂේක ලබමිනි. අති විශාල තරගකරුවන් රාශියක් අතරින් ජයග්‍රාහිකාව වන්නට වාසනාව ලද ඇය ඇඳුම් මෝස්තර නිර්මාණකරණයෙහි යෙදුන අයකි.
අතිශය ජනාදරයට පත් වූ සිරස කුමරිය පළමු අදියරෙන් හඳුනා ගත් දුලානි අනුරාධා, ශලනි තාරකා (පළමු අදියරෙහි කුමරිය) මේ වන විට අප ක්ෂේත්‍රයේ කැපී පෙනෙන චරිත බවට පත්ව සිටියි. පවනි ද තව නොබෝ දිනකින්ම ඔවුන් අතරට එකතු වනු ඇත.
මේ දිග හැරෙන්නේ පවනි පුවත්පතකට ලබා දුන් පළමු පුවත්පත් සංවාදයයි.
ඔබ මීට ප්‍රථම කිසිදු කලා නිර්මාණයකට දායක වෙලා නැහැ නේද?
ඔව්. ඒත් පාසල් යන කාලයේ ඇති තරම් කලා කටයුතු කළා. අධ්‍යාපනයෙන් අනතුරුව ෆැෂන් ඩිසයිනින්ග් පිළිබඳ ඉගෙන ගෙන ගියා. එතකොට තමයි සිරස කුමරියට ඇප්ලයි කළේ. ඒ නිසා ඒ කටයුතුත් තාවකාලිකව නැවැත්තුවා.
ඔබ සිරස කුමරිය හා සම්බන්ධ වුණේ ජනප්‍රිය වන්නට යැයි කෙනෙකුට හිතන්න පුළුවන්?
ඒකට මං මෙහෙම පිළිතුරක් දෙන්නම්. සිරස කුමරිය තරගයට ගිය පමණින් ජනප්‍රිය වෙන්න බැහැ. මෙම තරගය නෙවෙයි වෙනින් කිසියම් තරගයකට ගියත් ජනප්‍රිය වෙන්න බැහැ. ජනප්‍රියත්වය යම්තාක් දුරකට හෝ ලබන්න ඉදිරියට යන්න ඕනේ. ඉදිරියට යන්න හැකියාවන් තියෙන්න ඕනේ. අනික මම සිරස කුමරිය වුණයි කියලා පාරේ බැහැලා යන්න බැරි තරම් ජනප්‍රියත්වයක් ලැබිලා නැහැනේ. අනික මං පාසලෙන් ඉවත් වූ දින සිට කලාව කළා නම් මීට වඩා ජනප්‍රියවන්න තිබුණා. මට ඕනෑ වුණේ මේ තරගය හරහා මගේ හැකියාවන් හඳුනා ගන්න.
එහෙම පුළුවන් වුණාද?
සත්තකින්ම, අපිට තරගයේ අතරතුර ටෙලි චිත්‍රපටයක රඟපාන්න ලැබුණා. එතකොටයි මට රඟපාන්න පුළුවන් බව මං දැන ගත්තේ.
ඇත්තටම ඔබට රඟපාන්න පුළුවන්ද?
මං හිතනවා. ඒත් ඒ හැකියාව දියුණුකර ගන්න ඕනේ ස්වයං අධ්‍යයනයෙන්.
දැනටමත් රඟපාන්න ඇරැයුම් ලැබිලා ඇති වග දැනගන්නට ලැබුණා?
ඔව්. අධ්‍යක්ෂවරු කිහිප දෙනෙක් කතා කළා.
සිරස ආයතනය ඔබට නිදහස දීලා තිබෙනවාද රංගන කටයුතුවලට?
ආයතනය දැනුවත් කොට මට නිර්මාණවලට රංගනයෙන් දායකවන්න හැකියාවක් තියෙනවා.
සිරස කුමරිය වීමට ඔබට තිබූ සුදුසුකම් මොනවාද? ඔබට වැඩිය සුරූපී අය අවසන් දොළොස් දෙනා අතර සිටියා නේද?
ලස්සන විතරක් නෙවෙයි, ටීම් වර්ක් එක, නායකත්ව හැකියාව, වෙනත් කලා දක්ෂතා යනාදිය බැලුවා. ඒවාට මට ඉහළ ලකුණු ඇති. ඒකනේ මට කිරුළ හිමි වුණේ.
මං දැන් පවනිගේ පෞද්ගලික තොරතුරු ටිකක් අහන්නයි හදන්නේ?

ඡායාරූපය අමිත් එස්. සේනාරත්න

අහන්න.
පවනිගේ සම්පූර්ණ නම?
පවනි මදුශානි විජේසිංහ.
පාසල?
ඉස්කෝල දෙකකට ගියා. කොළඹ සංඝමිත්තා සහ ආනන්ද බාලිකා.
පදිංචිය?
ඉපදුණේ කොළඹ. වර්තමාන පදිංචිය කිරිබත්ගොඩ.
උපන් දිනය?
1987. 10. 17
උස?
අඩි 5යි අඟල් 3.
ලග්නය?
කුම්භ.
ආදරවන්තයා?
එහෙම කෙනෙක් ඉස්සර හිටියා. දැන් නැහැ.
තරගය අතරතුරදී විවාහ යෝජනා කීයක් ආවද?
දෙක තුනක්ම ආවා.
ඔබ ගැන වචන දෙක තුනකින් හඳුන්වන්න?
හිත හොඳ කෙනෙක්.
උදව් කළ පිරිස?
සුසාර දිනාල් මහතා ඇතුළු සිරස පවුලේ හැමෝම.
අවසන් වශයෙන් කියන්න සිරස කුමරියට සහභාගී වෙලා ඔබට ලැබුණු අපූරු අත්දැකීම?
අපට එක්තර අවස්ථාවක තිබුණා කුඹුරු කොටන්න. මං ජීවිතේට කුඹුරු කොටලා නැහැ. මඩ නාගෙන අතට නුහුරු උදැල්ල පාවිච්චි කරමින් කුඹුරු කොටපු හැටි ජීවිතයට අමතක වන්නේ නැහැ.
source- http://www.sarasaviya.lk

රාණිගේ වෙස් පෙරැළේ

රාණිගේ වෙස් පෙරැළේ

වාහන පිට වාහන තෑගි දුන්නත් රාණි මුඛර්ජිගේ සිත් ගැනීම නම් ආදිත්‍ය චොප්රාට පහසු දෙයක් නොවෙන පාටය. හැංගි හැංගි වෙස් බැන්දත් මෙතෙක් කල් ලොවම ආදිත්‍ය චොප්රා සහ රාණි ඉක්මනින්ම එක වහළක් යටට වනු ඇතැයි කියා සිතූහ. යාෂ් රාජ් චිත්‍රාගාරයේ වැඩි දෙනා ඇය අමතන්නේ ‘නංගි’ කියායි.
ඇය එම චිත්‍රාගාරය පරිශීලනය කරන්නේ තමන්ගේ බූදලයක් ලෙසය. චිත්‍රාගාරයේ සේවකයන් සමඟ ද රාණි ආරාවුල් ඇතිකර ගන්නීය.
රාණි මෙතරම් බලයක් පෙන්වන්නේ ආදිත්‍ය සමඟ හොර රහසේ විවාහ වී ඇති නිසාදෝ කියා සමහරු සිතන්නට පෙළැඹුණේ ඇයගේ බලපුළුවන්කාරකම් නිසයි.
රාණිගේ අලුත්ම සිනමාපටය ‘ආයියා’ ප්‍රවර්ධනය කිරීමට යාෂ් චිත්‍රාගාරය යොදා ගන්නා ලදී. මෑතකදී ඇය ආදිත්‍ය චොප්රා සමඟ විවාහ වන බවට ගෙතී තිබුණු සියලු කටකතා, වචනවලින් රාණි පුළුස්සා දැම්මේ මෙසේය. ‘මං වැදගත් පවුලක දියණියක්. පවුලේ ගෞරවය රැකෙන විවාහයක් කර ගන්නවා. විවාහයක් කර ගැනීමට සිතුණු විට එය සඟවන්නේ නැහැ. ලොවටම පවසනවා.’ රාණි දැන් පසු කරන්නේ ජීවිතයේ තිස් හතර වැනි සැතැපුම් කණුවයි. ඇය සිටින්නේ විවාහය පමා කළ යුතු වයසක නොවෙයි.
රාණිත්, ආදිත්‍යත් බොහෝ කලක් යනතුරු පැපරාසීන්ගෙන් සැඟ වී සිටියහ. එහෙත් මූම්බායි ගුවන් තොටුපලේදී දෙදෙනා කැමරාවට හසුකර ගන්නට සමත් වූ ඡායාරූප ශිල්පීහු ද සිටිති. ඔහු රාණිට රුපියල් කෝටි ගණනක් වටිනා මෝටර් රථයක් තෑගි දුන්නේ මෑතකදීයි.
ළමා වියේ සිට මිතුරියක වූ, පසුව ආදිත්‍යගේ ආදරණීය බිරිය වූ පායල් ද දික්කසාද කළේ මෑතකදීය. ඒ යාෂ්රාජ් පවුලේ බලවත් විරෝධය මැදයි.
රාණිත් ආදිත්‍යත් නිතරම සුපිරි ආපන ශාලාවල දකින්න ලැබුණු යුවළකි. එහෙත් දැන් ඇය ඔහු සමඟ විවාහ වීම ප්‍රතික්ෂේප කරන්නීය.
මේ දිනවල ෂාරුක් – කත්‍රිනා මුල්වරට එකට රඟන ‘ජබ් තක් හයි ජාන්’ සිනමාපටයේ සුන්දරත්වය වඩාත්ම විඳින්නේ ෂාරුක් ඛාන්ය.
ඔහු පවසන අන්දමට සිනමාපටය පුරාම ඇත්තේ ආදරණීය ගීතාවලියකි. මේ ගීත, ප්‍රවීණ ගීත රචක ගුල්සාර්ගේ පෑන් තුඩින් ලියැවුණු පද නොවෙයි. ඒ ආදීගේ (ආදිත්‍යගේ) හදවතින්ම රාණි වෙනුවෙන්ම ඉපදුණු කවි සංකල්පනාය.
ආදිත්‍ය චොප්රා සිය හැඟීම් සඟවා ගන්නට කැමැති අයකි. එහෙත් රාණි පිළිබඳ උතුරා යන හැඟීම් සිතෙහි සිරකර නොගෙන ඔහු පෑන් තුඩින් ගලා යාමට සලස්වා තිබේ.
එහෙත් රාණි මේ ලෙස පිටු පෑවොත් අදීගේ ප්‍රේමණීය වචන වෙනුවට, වචනවලට පෙරැළෙනු ඇත්තේ විරහාවේ කඳුළුය.
කොහොමටත් මේ දිනවල රාණිගේ හදෙහී රජු වී සිටින්නේ ‘ආයියා’ සිනමාපටයයි. ඇය එහි රඟන්නේ පිරිමින්ගේ විවිධ වූ ගන්ධයන්ට ඇලුම් කරන මරාති තරුණියකගේ චරිතයකි.
තමන් ශ්‍රී දේවි, මධුරි ඩික්සිත් හෝ ජූහි චව්ලා කියා සිතන ඇය මෙහි වෙනස්ම ආකාරයක රංගනයක යෙදෙන්නීය. රාණිගේ ‘ආයියා’ සිනමාපටය තිරගත වීමට නියමිතව ඇත්තේ ඔක්තෝබර් 12 වැනි දිනයි.
එහි සාර්ථකත්වය හෝ අසාර්ථකත්වය ඇයගේ බැස යන තාරකා ආලෝකය ගැන අනාවැකි පවසනු ඇත.
‘ආයියා’ තිරගත වන්නේ අභියෝග රැසක් සමඟය. කරීනා රැඟූ ‘හෙරොයින්’ (සැප්: 21), ප්‍රීති සින්තා කලකට පසු රඟන ‘ඉෂ්ක් ඉන් පැරිස්’ (ඔක්: 05), ශ්‍රී දේවි විවාහයට පසු රඟන පළමු සිනමාපටය ‘වින්ග්ලිෂ් ඉන්ග්ලිෂ්’ (ඔක්: 05), ඒ වන විට සුළු සුළු කාල පරතර ඇතිව තිරගත වී අවසන්ය.
මේ රැජනන් සිවු දෙනා අතර සුපිරි සටනක් සිදුවන බව නම් ඒකාන්තය. එයින් ජය ගන්නේ කවුරුන් වුවත්, ඒ නිසාත් රාණිගේ හද ගැස්ම වේගවත් වී ඇති බව නම් සිකුරුයි.
රාණිගේ වචනවලින්ම පැවැසුවොත් ඇය සිහින දකින්නියකි. ඇයගේ සිහින අතර අනාගත සැමියාට සාදා දෙන අංග සම්පූර්ණ මන්දිරය ද තිබේ. සිනමාවට සම්බන්ධ වී පහළොස් වැනි වසර සම්පූර්ණ කරන ඇය වෘත්තීය ජීවිතයේදී සේම සැබෑ ජීවිතයේදී ද දකින සිහින යථාර්ථයක් වේවා යන්න රසිකයන්ගේ පැතුමයි.
source- http://www.sarasaviya.lk

කෙල්ලො තාමත් අතවනනව අපට

චමින්දල කියල කොල්ලො කීවත් විහිළුවට විසි අටේ තිහේ කෙල්ලො තාමත් අතවනනව අපට

වයසට ගියාම අපට හඳ පායන්නේ නැද්ද . . .

පිං දහම්ම කරගෙන විතරක් හිටියා නම් ඇද්ද? . . .

චමින්දලා කියල කොල්ලෝ කීවත් විහිළුවට . . .

විසි අටේ තිහේ කෙල්ලෝ තාම අතවනනවා අපට . . .

නුපුරුදු පද වැලක් ඇති අපූරු ගීතයක් ගයමින් දේහදාරී පුරුෂයකු සමඟ කොණ්ඩය වවාගත් තවත් අමුත්තකු අප සරසවිය ඡායාරූපාගාරයට ඇතුළු වූවා. බැලූ බැල්මට එකවරම හඳුනාගත නොහැකි වුවත් ඔහු මෙරට ජනප්‍රිය කලා තරුවක්.
කුමාර තිරිමාදුර.
ඔහුගේ අනන්‍යතාව වූ දිගු කෙස් කළඹට සමු දී කොණ්ඩය කොටට කපා තිබූ නිසා එකවරම ඔහු හඳුනාගත නොහැකි වූවා. දිවයිනේ නන් දෙසින් පැමිණි අපේ පාඨක හිතවතුන් වූ,
හෝකන්දර ගිල්බට් පෙරේරාත්, නාත්තන්ඩියේ ගීතාංජලී මාලා වසන්තිත්, කඩුගන්නාවේ සිතාරා විජේරත්න දියණියත්, ජේ. සී. කුමාරසිංහත් ඒ වන විටත් සරසවිය ඡායාරූපාගාරයට වී සිටියේ කුමාරගේ පැමිණීම අපේක්ෂාවෙන්.
නියමිත වේලාවටත් කලින් පැමිණි කුමාර ඊට පෙර දිනයකදී දෙරණ ටී. වී. නාලිකාව මෙහෙය වූ දෙරණ සිනමා සම්මානයෙන් ද පිදුම් ලද්දෙක්. සියල්ලන්ම හඳුනාගත් කුමාරට පළමු පැනය යොමු කළේ සරසවිය පැරැණි පාඨකයකු වූ ගිල්බට් පෙරේරායි.
ඔබ සම්මානයෙන් පිදුම් ලැබීම ගැන යමක් කියනවද?
‘වසර ගණනක සිට වේදිකාව, පුංචි තිරය, සිනමාව හරහා කළ රංගනය අමතක කරන්න බැහැ. සිනමාවට වඩා මම වේදිකාවේ හා පුංචි තිරයේ රංගනයෙන් දායක වෙලා තියෙනවා. නමුත් මේ වේදිකාව හා පුංචි තිරය පසු කරමින් ඊට ඉහළින් පිම්මක් පැනලා සිනමාව සඳහා මට සම්මාන ලැබුණා. හැබැයි මම සිනමාවට වඩා රංගනයෙන් වැඩි දායකත්වයක් දැක් වූවේ වේදිකාවට හා පුංචි තිරයට. මේ මොහොතේ මගේ හැකියාවන් අගය කිරීම ගැන හා සම්මානයක් ලැබීම ගැන පුංචි සතුටක් හිතේ තියෙනවා.
ගාමනී චිත්‍රපටයේ හොඳම සහාය නළුවා වීමත් සතුටක්. ඒ වගේම යථාර්ථවාදී රංගනයක් ඉදිරිපත් කරන්නට යුද හමුදාවෙන් ලැබුණු සහාය අත්දැකීම් ගැන නම් මතක් කරන්නම ඕනේ. රියර් අද්මිරාල් සරත් වීරසේකර නොවන්නට මට අද මේ සම්මානය නෑ. ඒ වගේම තමයි මගේඅම්මා. එතුමිය තමයි මගේ ජීවිතයේ රංග පාසල වුණේ. මේ හැම දේම අතරේ යුද හමුදා පුහුණුව ලබා දුන් කර්නල් රත්නප්‍රිය ඇතුළු යුද හමුදා කණ්ඩායමට විශේෂ ස්තුතියක් හිමි විය යුතුමයි. ඒ සඳහාත් මෙය අවස්ථාවක් කර ගන්නවා.
ස්ටුඩියෝ එකෙන් ඇතුළු වෙනකොටම ගායනා කළ ගීතය කාගේද?
ඒ ගීතය මගේ. ළඟදීම නිකුත් කරන මගේ සී. ඩී. එකේ තියෙන ගීතයක්. ඒ ගීතයේ පද රචනය කර සංගීතවත් කළේ අර මාත් එක්ක ඇවිත් ඉන්න විමල්ජිත් දොඹගහවත්ත.
ඔය විදියට ලස්සනට සිංදු කියන ඔයාට සංදර්ශනවලට ආරාධනා ලැබුණාම රඟපෑමෙන් ඈත් වෙයිද? අපට අර හොඳ නළුව නැති වෙයි ද දන්නේ නැහැ. ඒ මාලා වසන්ති නිහඬව සිට ඇසූ පැනයයි.
ඇත්තමයි මාලා ඔය ප්‍රශ්නයම මගෙන් සංජීවනී වීරසිංහත් ඇහුවා. ඇයට මගේ ගීතයක් අහලා නෙතට කඳුළුත් පිරුණා. ඒ එක්තරා රූපවාහිනී වැඩසටහනකදී. ඔයා අහපු ප්‍රශ්නයට උත්තරේ නම් මම ගායනයෙන් කොපමණ කාර්යබහුල වුණත්, රංගනයට නම් තිත තියන් නැහැ.
එහෙනම් අර සිංදුව, සංජීවනී ඇන්ටිගේ ඇස්වලට කඳුළු ඉණුවේ. අනේ ඒක කියන්නකෝ?
ඒ සිතාරාගේ ඉල්ලීමයි.

රන් මාල මගුල් මුදු උකස් කළා . . .

කර පාළු වෙලා බොහෝ කල් වෙලා . . .

ඔය පබළු මාල ගෙලට වටින් නෑ . . .

දුක් නොවෙන් සින්න වෙන්න දෙන්නේ නෑ . . .

මේ ගීතයේ පද රචනය අපේ දොඹ්ගේ. සංගීතය විශිෂ්ඨ සංගීතවේදියකු වූ එච්. එම්. ජයවර්ධනගේ.
ජනප්‍රිය වෙන්න වෙන්න සමහරු කඩේකටවත් යන් නෑනේ. ඔබත් එහෙමද? නිහඬව සිටි කුමාරසිංහ විමසුවා.
මෙහෙමයි කුමාරසිංහ මහත්තයෝ, ජනප්‍රියත්වය කියන්නේ තාවකාලික දෙයක්. ඒ ජනප්‍රියත්වයෙන් අධිමානයට පත්වෙනවා නම් ඒ අදාල කෙනාගේ බුද්ධියේ තියෙන අඩුවක්. මම මහරගම පොළ තියෙන දවසට, කොට කලිසමක් ඇඳලා රබර් සෙරප්පු දෙකක් දාලා පොළේ යනවා. හැමෝම එක්ක කතා කරනවා. රංගන ශිල්පියෙක් වුණාම මේ සමාජය සමඟ ගැටෙන්න ඕනෑ. හුදකලා වෙලා රංගන ශිල්පියෙක් හෝ ශිල්පිනියක් වෙන්න බෑ. ජෝ අබේවික්‍රම මහත්තයා කියන්නේ එවැන්නෙක්. ඔහු වරක් ප්‍රකාශ කරලා තිබුණා ලේල්ලෝපිටිය ඔහුගේ ගමේ ඉඳලා කොළඹ එනකොට දැක්ක චරිත ඔහුගේ ජීවිත කාලේදීම රඟපාලා ඉවර කරන්න බැරි වුණා කියලා. ඒ කතාවම ඇති රංගන ශිල්පියෙකුගේ සමාජගත වීමට.
ඔබ හාස්‍ය රංගනය සහ දුෂ්ඨ චරිත පුංචි තිරයේදී එකට රඟපානවා. නමුත් සමහරුන්ට හාස්‍ය නම් හාස්‍ය විතරයි. ඒකාකාරී චරිතවලට කොටු වෙලා. මේ ගැන මොකද හිතෙන්නේ? ගිල්බට්ගෙන් නැවත පැනයක්.
අපේ ගිරිරාජ් කෞෂල්‍ය මිතුරා කියනවා කුමාර උඹ තමයි වාසනාවන්තයා. හාස්‍ය, දුෂ්ඨ ආදී විවිධ චරිත උඹට රඟපාන්න ලැබුණා කියලා. අපේ රටේ යමෙක් හාමුදුරු චරිතයක් රැඟුවොත් ඔහු හැමදාම හාමුදුරුවෝ. හාස්‍ය රංගන ශිල්පිියෙක් වුණොත් හාස්‍ය. මම වසුදා නාට්‍යයේ හාමුදුරුවන්ගේ චරිතය රඟපෑවට පස්සේ විවිධ ඒකාංගික හා දීර්ඝ ටෙලි නාට්‍යවල හාමුදුරු චරිත 21 ක් රඟපෑවා. අපේ රටේ සමහර දක්ෂ නළු නිළියෝ ඉන්නවා, හැබැයි ඔවුන්ව ඒකාකාරී චරිතවලට කොටු කරලා කියලයි මගේ හැඟීම.
ඔබ ක්ෂේත්‍රයේ වඩාත් ගරු කරන හා අනුගමනය කිරීමට කැමැති රංගන ශිල්පීන් කවුද? ඒ පැනය මාලාගෙන්.
සිනමා සක්විති ගාමිණී ෆොන්සේකා, ඩොමී ජයවර්ධන, ජෝ අබේවික්‍රම, ටෝනි රණසිංහ වගේ ප්‍රවීණයන්. ඇත්තටම බලන්න අපේ ජෝ අබේවික්‍රමයන් තමයි සිංහල සිනමාවේ හිටපු එකම හාස්‍ය හා දුෂ්ඨ චරිත එකවර කළ හැකි නළුවා. ඔහු වැලිකතරේ එක ආකරයක රංගයක යෙදෙනවා. අනිත් පැත්තෙන් අල්ලපු ගෙදර තවත් ආකාරයක හාස්‍ය රංගයක්. බලන්නකෝ එකම රංගන ශිල්පියෙකු මේ විශිෂ්ඨ රඟපෑම. සාරවිට චිත්‍රපටයේ තවත් විදියක වෙනම රඟපෑමක්. පුරහඳ කළුවර තවත් රඟපෑමක්. ඉතින් අපි විදේශ නළුවන්ගෙන් යම් කිසි දේවල් උකහා ගන්නට පෙර අපේම සම්පත්වලින් උපරිම ප්‍රයෝජන ගන්න ඕනේ නේද? මේක තමයි රංගනයේ ආශ්චර්ය.
රඟපෑම කුමාර අයියගේ වෘත්තියද? නැවතත් මාලාගෙන් පැනයක්.
කලක් මගේ රැකියාව වුණේ පුවත්පත් ආයතනයක සෝදුපත් බලන්නෙකු හැටියට සේවය කිරීමයි. එහිදී මට පත්තරවල යන මරණ දැන්වීමේ සිට මහාචාර්යවරුන්ගේ විද්වත් ලිපි දක්වා විවිධ තරාතිරමේ ලිපි කියවන්න ලැබෙනවා. එයින් මගේ දැනුමට ලොකු පන්නරයක් ලැබුණා. වසර දහඅටක ඒ රැකියාවට සමු දී තමයි මම රංගන වෘත්තියට එළැඹුණේ. දැන් මගේ සම්පූර්ණ කාලය රංගනයට යොදවලා තියෙන්නේ.
ඔබ රංගනයට පිවිසුණේ කොයි කාලේද? නැවතත් ගිල්බට් විමසුවා.
පාසල් යන කාලේ ඉඳන්ම රඟපාන උණ තිබුණා. හැබැයි මොරටුව මගේ ගමේ දවසක් දහම් පාසලේ රංගන තරගයක් තිබුණා. ආර්. ආර්. සමරකෝන්, ජගත් මාරසිංහ ඇතළු පිරිසක් විනිශ්චයට ඇවිත් හිටියා. පසුව ජගත් මාරසිංහ මාව විවිධ නාට්‍ය වැඩමුළුවලට යොමු කළා. පසු කාලයේදී මහාචාර්ය එදිරිවීර සරච්චන්ද්‍රයන්ගේ සිට විවිධ නාට්‍යවේදීන් යටතේ, තේ හදන කෙනාගේ සිට රංගන ශිල්පියා දක්වා විවිධ කටයුතුවල නිරත වුණා. ඒ තමා මගේ රංගනයේ ආරම්භය.
ඔබ අපේ ප්‍රකට රංගවේදියකු වූ නිහාල් සිල්වා සමඟ රඟපාලා තියෙනවාද? ගිල්බට් නැවතත් ඇසුවා.
එතුමා අවාසනාවන්ත ලෙස මිය ගියා. එදා රාත්‍රියේ වේදිකාගත වූ පුන්තිලා නාට්‍යයත් මම නැරැඹුවා. නමුත් එතුමත් එක්ක කවදාවත් මට එකට රඟපාන්න ලැබිලා නැහැ.

අනේ තව සිංදුවක් කියන්නකෝ . . . සිතාරාගෙන් නැවතත් ඉල්ලීමක්.

දඟර වානේ කම්බි වගේ අඟර දඟර දාගෙන . . .

මොනර පැටික්කිය වාගේ මයුර තාන තම්දෙන . . .

හතර අතට කරක කරක හැම නෙතටම රිංගන . . .

මහරගමදී හම්බ වුණේ මේ උඩැක්කි කෝළම . . .

මේ ගීතයත් රචනා කරලා සංගීතවත් කළේ අපේ මේ විමල්ජිත් දොඹගහවත්ත මගේ මිතුරා.
සිනහවෙන් හා ගීතයෙන් පිරුණු මියුරු තරු හමුවක් හෙමිහිට ගෙවී යමින් තිබුණා.
තරු මිහිරේ තෑගි අනුග්‍රාහකයා වන ‘ලක්සළු සල’ ආයතනයෙන් ලැබෙන තෑගි වවුචර කුමාර අතින් අපේ පාඨකයන් ලබා ගත්තේ අපමණ සෙනෙහසින්. එමෙන්ම කුමාරට ද තෑගි භෝග පාඨකයන්ගෙන් ලැබුණා. අපේ ටෙනිසන්ගේ තෙවැනි ඇසින් හැඩවුණ කුමාරගේ ලස්සන සේයාරුවක් ඔහුගේ අත්සනින් යුතුව පාඨකයන්ට ද ලැබුණා.
අපි අවසාන වශයෙන් අපේ රෝමා රෝෂි ලක්සළු සල මාධ්‍ය සම්බන්ධීකරණ නිලධාරිනි මතක් කරන ගමන්ම දොඹේ අයියගේ ‘මඩකලපුවේ’ අලුත්ම සිංදුව අහමු කියූ කුමාර ද විමල්ජිත් දොඹගහවත්ත සමඟ තරු මිහිරේ රස හෝරාවේ අවසන් භාගය ගීතයෙන් මිහිරිමත් කළා. මඩකලපුවේ පොඩි කඩයක් දාගෙන මුල් ගායකයා වන දොඹගහවත්ත හරිම අපූරුවට අලුත් ගීත කිහිපයක්ම ගැයුවා.
කුමාර තිරිමාදුරගේ ආගමනයෙන් හැඩ වූ තරු මිහිරක නිමාව එසේ සනිටුහන් වූයේ සුන්දර මොහොතක මිහිරි මතක සැවොම සිත් සතන්හි සඟවා ගනිමිනි.

කුමාරසිංහ, ගිල්බට් ගේ අත්පොලසන් නදට කුමාර ගී ගයයි.	සිතාරා පුංචි දියණියට කුමාරගෙන් රස කෑමක්.
ගීතාංජලීට, කුමාරගෙන් සමරු තිළිණයක්.	සැවොම තුටු වී ගී ගයද්දී.
ගීතාංජලීගේ සොහොයුරාටත් තිළිණ.	ගිල්බට්ගෙන් කුමාරට පැනයක්.
මාලාටත් සමරු තිළිණ.	පුංචි සිතාරාට ලක්සළුසල තෑගි, කුමාර ගේ අතින්.
ගිල්බට්ගේ හදපිරි සෙනෙහස. source- http://www.sarasaviya.lk/

ලතාට 83 යි

ලතාගේ හඬ මුල් වරට ඉවත් කරයි

තිරයේ ජීවත්වන ආදරවන්තියන් ප්‍රේමයේ මිහිරෙන්, විරහවේ වේදනාවෙන් මුසපත් කළ ඒ කෝකිල හඬ තවමත් තරුණය. එහෙත් ඒ හඬෙහි හිමිකාරිය සැප්තැම්බර් 28 වෙනි දිනට පා තබන්නේ අසූ තුන් වැනි වියටයි.
‘මට මහලු වයසේ - ගැයිය හැකි බව කියමි සතොසේ’ කියා උදම් වැකි නොපැවසුව ද ඇය එය ලොවට ඔප්පු කරන්නේ තවමත් ගී ගැයීමෙනි. ලතා මංගේෂ්කාර්, භාරත රත්නයට, ලබන වසරටත් සංගීත ප්‍රසංගවලට ඇරැයුම් ලැබී තිබේ. ළඟදී ඇය අට හැවිරිදි ළමා නිළියකට ගී ගැයුවාය. ‘සත්‍රන්ජි පැරැෂුට්’ (ඉචබපචදඨඥඥ ර්‍ථචපචජඩභබඥ) නම් සිනමාපටයේ ළමා නිළිය වෙනුවෙන් ලතා මංගේෂ්කාර් ගැයූ ගී ඇසෙන විට එය ළමයකුගේ නොවන බව කෙසේවත් පැවැසිය නොහැකි බව කියන්නේ සිනමාපටයේ අධ්‍යක්ෂවරයා වන විසි හතර හැවිරිදි විනීත් කේත්‍රපාල්ය.
ගැයු ගී ගණන මෙපමණකැයි කියා ගණන් බලා නැති නිසා ලතාගේ ගී සංඛ්‍යාව තවමත් අබිරහසකි. 1974 ගිනස් පොතේ වාර්තාවට අනුව 1948 වසරේ සිට 1974 දක්වා ඇය ගැයූ ගී ගණන විසිපන්දහසකට අධිකය. ඒ අනුව ලතා ඉතිහාසයේ වැඩිම ගී ගණනක් තැටිගත කළ ගායිකාව ලෙස ගිනස් වාර්තා පොතට එක්විණි. තවත් සමහරු පවසන්නේ ඇය ගීත පනස් දහසක් ගයා ඇති බවයි. කෙසේ වුවත් සිය ගණනක් තාරකාවෝ දශක හයහමාරක් පුරා ඒ ලතාවත් හඬින් ළයාන්විත වූහ.
‘මාතා ඒක් සපූත් කි දුනියා බදල් දී තූ’ හින්දි ගීය ගජභාහු (1943) සිනමාපටයට ගයමින් හින්දි ගී ලොවට අවතීර්ණ වූ ලතා, සංගීත අධ්‍යක්ෂ නෞෂාද්ගේ කීමට මුලදී අනුකරණය කළේ නූර් ජෙහාන්ගේ ගායන ශෛලියයි. පසුව ඇය තමන්ගේම ශෛලියක් ගොඩ නගා ගත්තාය.
ඇය ගී ගැයූ මුල් කාල වකවානුවේදී විශිෂ්ට රංගධරයකු වූ දිලිප් කුමාර්ගෙන් ලතාට චෝදනාවක් එල්ල විය.
ඇයගේ හින්දි / උර්දු ගැයුමන්හී මහාරාෂ්ත්‍ර ඌරුව ඇතැයි යනුවෙන් නැගුණු ඒ චෝදනාව ඇය බැහැර වන්නට හැරියේ ෂාගි නම් ගුරුවරයාගෙන් උර්දු හැදෑරීමෙනි.
ලතා මංගේෂ්කාර් යනු ගුරුවරුන් කීප දෙනකුගෙන්ම ඔප වැටුණු මැණිකකි. උස්තාද් අමනත් අලි ඛාන් ඇයට හින්දුස්තානි රාගධාරී සංගීතය කියා දුන් මුල්ම ගුරුවරයායි. 1947 දී ඉන්දියාව, පාකිස්තානය වශයෙන් භාරත දේශය දෙකඩ වූ පසු ඇයගේ ගුරුවරයා වූයේ දේවාස්වාලේය.
ගුලාම් හයිදර් ඇය ගී තරුවක් කළ සංගීත අධ්‍යක්ෂවරයායි. හයිදර් චිත්‍රපට නිෂ්පාදක ශෂාදර් මුඛර්ජිට ලතාව හඳුන්වා දුන්නත්, මුඛර්ජි පැවසුවේ ඇයගේ හඬ පමණට වඩා සිහින් කියායි.
එදින සංගීත අධ්‍යක්ෂවරයකු ලෙස හයිදර් පැවසූ අනාවැකිය පසුව සියයට දෙසියයක් නිවැරැදි විය. ‘ඉදිරි කාලය්දී තමන්ගේ සිනමාපටයට ගී ගයන ලෙස ඉල්ලා අධ්‍යක්ෂවරු ලතාගේ දෙපා මුල වැටී අයදිනවා’ ඒ අනාවැකියයි. 1949 තිරගත වූ ‘මහල්’ සිනමාපටයට මධුබාලාට ලතා ගැයූ ’අයේගේ ආනේ වාලා’ ගීයත් සමඟ ඒ අනාවැකිය සැබෑ විය. ඛේම්චන්ද් ප්‍රසාද් ඇයට ඒ වරම ලබා දුන් සංගීත අධ්‍යක්ෂවරයායි. කිශෝර් කුමාර් ගී ලොවට හඳුන්වා දුන්නේත් ඔහුමය.
ඉන්දියාවේ සෑම සංගීත අධ්‍යක්ෂවරයකුගේම තනුවට ලතාගේ ගීතවත් හඬ අවදි වී තිබේ. එහෙත් එක් සුප්‍රකට සංගීත අධ්‍යක්ෂවරයෙක් ලතාගේ හඬ සිය සංගීතයට මුසු කළේ නැත. ඒ ඕ. පී. නයාර්ය. ඔහු සිය සංගීතයට ලතාගේ හඬ නොපෑහෙන බව සිතූ අයෙකි. එහෙත් ලතාගේ නැගණිය, ආශා බෝස්ලේ ඔහුගේ ප්‍රියතම ගායිකාව වූවාය.
ඒ රිදී සීනු සැළෙන හඬ ඇතැම් සංගීතඥයන්ගේ තනු හා උරණ වූ අවස්ථා ද නොතිබුණා නොවෙයි. 1962 දී පණ්ඩිත් ශ්‍රී ජවහර්ලාල් නේරුගේ නෙතට කඳුළු එක් කළ ‘ආයේ මෙරේ වතන් කි ලෝගන්’ (‘ඕ මාගේ දේශයේ වැසියෙනි’) ගීය නිර්මාණය වූයේ ලතා හා සී. රාමචන්ද්‍ර අධ්‍යක්ෂවරයා අතර සිත් නොහොඳකම් තිබියදීය. 1962 වන විට ලතා, රාමචන්ද්‍රගේ තනුවලට ගී නොගැයුවාය.
ඒ දෙදෙනා එකිනෙකාට නොගැළපීම හේතුවෙන් ඇති වූ මතභේදයක් නිසයි. එහෙත් ගීත ලියූ කවි ප්‍රදීප් තදින්ම කියා සිටියේ මේ ගීතය ගැයිය යුත්තේ ලතා මංගේෂ්කාර් පමණක්මයි කියායි. ගීතයේ පද කිය වූ පසු පෞද්ගලික නොමනාපකම් පසෙක තැබූ ලතා ‘ආයේ මෙරේ වතන්’ පද වැලට හඬ මුසු කළාය. අදට ද ඇයගේ සිනමා ගී නොවන ගී අතරින් එය ජනප්‍රියම ගීතයකි.
1957 වසරේදී ලතා හා සචින් දේව් (එස්. ඩී.) බර්මන් අතර ද එවැනිම ගැටුමක් ඇති විය. මේ ගැටුම කෙතරම් දුරදිග ගියා ද කිවහොත් ලතා, එස්. ඩී. සංගීත අධ්‍යක්ෂවරයාගේ තනුවලට 1962 වනතුරුම ගැයුවේ නැත.
ලතාගේ ගී හඬ තම රංගනයට මුසුවීම සෑම සුපිරි තාරකාවකගේම පැතුමකි. සෑම අධ්‍යක්ෂවරයකුටම අවශ්‍ය ඇයගේ ගීත තම සිනමාපටයට එක්කර ගැනීමටයි. ඒ අතරින් අධ්‍යක්ෂ යාෂ් චොප්රා පෙරමුණේම සිටියි.
ලතා මංගේෂ්කාර්ගේ ගී හඬ නොමැති සිනමාපටයක් යාෂ්ගෙන් නිර්මාණය වී නැත. ඇය ඔහුගේ ආත්මීය සොයුරායි. (දිලිප් කුමාර්ට ද ලතා ආත්මීය සොයුරකු වශයෙන් සලකයි). ඔහු අවසන් වරට අධ්‍යක්ෂණය කළ සර්සාරා සිනමාපටයට ඒ හඬින් එක් වූ මාධූර්යය තවමත් රසික දෙසවනින් ඈත් වී නැත.
එහෙත් යාෂ්ගේ, ෂාරුක් සහ කත්‍රිනා රඟන ‘ජබ් තක් හේ ජාන්’ නවතම සිනමාපටයට ප්‍රථම වරට ලතාගේ හඬ එක් නොවන බවට රාවයක් පවතී. ඒ සිනමාපටයේ ප්‍රධාන චරිතය නිරූපණය කරන කත්‍රිනා කායිෆ්ගේ හඬට ලතාගේ හඬ කොහෙත්ම නොගැළපෙන බවට යාෂ් හා කිහිප දෙනකු හැර අන් අය විශ්වාස කරන නිසයි.
ලතා මංගේෂ්කාර් නාමය ගීතයත් සමඟ බැදී තිබුණත්, ඇයට ගායනයෙන් බැහැර වූ ලොවක් තිබේ. ඇය චිත්‍ර අඳින්නට, රූපලාවණ්‍යයට සහ ඡායාරූප ගැනීමට, ගැයුමට සේම කැමැතිය. ලතාගේ ප්‍රියතම නිළිය කාජල්ය. කාජල්ගේ ගතිගුණ තමන්ගේ තරුණ කාලය සිහි ගන්වන බව ඇය පවසන්නීය. කාජල්ගේ ලොකු අම්මා නූටාන්ට, මව තනූජාට ද ඇය ගී ගැයුවාය. කෙදිනක හෝ කාජල්ගේ දියණියට ද සිය හඬ මුසු කිරීම ඇයගේ පැතුමයි.
මේ සියවසේ භාරතයේ බලවත්ම ජන්මපත්‍ර හිමිකරුවන්, හිමිකාරියන් දස දෙනාගෙන් එක් අයකු වන ඇයට ඒ පැතුම ද ඉටුකර ගන්නට ලැබෙනු ඒකාන්තය. ඒ අසූ තුන් වැනි වියට පා තැබීමේදී ඇයගේ මිහිරි හඬ තවත් වසරකින් තරුණ වන නිසයි.
source- http://www.sarasaviya.lk